ख्वपय् न्हापांगु नेवाः हाइकु सम्मेलन

याताजः नेपालभाषा साहित्य दबूया ग्वसालय् म्हिगः ख्वपया भक्तपुर गेष्ट हायसय् न्हापांगु वृहत नेवाः हाइकु सम्मेलन जुल। हाइकु ब्वने न्यने सहलह ज्याझ्वः कथं जूगु सम्मेलनया सभानायः जनकवि दुर्गालाल श्रेष्ठ व मूपाहां वरिष्ठ समालोचक माधवलाल कर्माचार्य जुयादीगु खः। याताजःया सौरभ शाक्यं लसकुस व मूपाहांपाखें त्वाः देवाय् मत च्याकाः न्ह्याःगु उगु ज्याझ्वलय् न्हापांगु ब्वय् नेवाः भाय् व छुं खसभासं नं थीथी हाइजिनपिंसं हाइकु ब्वनेज्या जुल ।

थुगु सम्मेलनय् माधवलाल कर्माचार्य, दुर्गालाल श्रेष्ठ, भूषणप्रसाद श्रेष्ठ, तबः मरु, राजा शाक्य, चेतनाथ धमला, अगिब बनेपाली, सौरभ शाक्य, विमल ताम्राकार, कृष्णभक्त बोडे, कृष्णमोहन जोशी, राजेश प्रजापति, सन्तोष भुजेल, समान्त, बुद्ध नेवाः, प्रदिप श्रेष्ठ, शाकिव रत्न, भानुमति श्रेष्ठ, गणेशराम लाछि, बद्रि 'वेदना', काशीराम विरस व अमृतमान स्यस्यःपिंसं थःथःपिनिगु न्यापु न्यापु हाइकु ब्वनादीगु खः ।

ज्याझ्वःया निगूगु ब्वय् हाइकुयात कयाः समालोचक इन्द्र माली, माधवलाल कर्माचार्य, चेतनाथ धमला व राजकुमार पाण्डेपिंसं दुग्यंक समिक्षात्मक बिचाः प्वंकादिल। अथेहे लक्ष्मण राजवंशी, पूर्णबहादुर बैद्य, डा. योगेन्द्र प्रधान व रत्नगोपाल साँय्जुपिंसं नं न्ववानादीगु ज्याझ्वलय् शाक्य सुरेनं थीथी न्ह्यसः न्यनाः सहलह ब्याकादीगु खः। ग्वसाः खलःपाखें विमल ताम्राकारं सुभाय् देछायादीगु व कृष्णभक्त बोडें नेपालभाषाय् आःतक पिदंगु थीथी हाइकु सफूया बारे जानकारी बियादीगु खः ।

More Stories Like this