'पटाचारा' नेवाः फिल्म स्वयेधुंकाः

शाक्य सुरेन

नेपालभाषाय् सिलु' फिल्म न्हापां पिहांवल। अनंलि 'राजमति'। 'सिलु' फिल्मं ब्यावसायिक रुपं छुं हद् सफल जुयाः क्यने फतसा 'राजमति' आर्ट मुभिकथं थःगु क्षमता प्रदर्शन याःगु खः। लिपा 'यांमिखा' फिल्म नं यक्वस्यां ययेकल। थुकथं नेवाः फिल्मया लहर स्वाना वन। अनं लिपा नेपाः साहित्यया लोकबाखं, हास्यब्यंग विषयवस्तुयात कयाः यक्व हे फिल्म तयार जुल तर थुपिं फुक्क व्यावसायिक कुशलता मदयेक 'लो बजेट' यानाः रहर पूवंके थें जक जुल। थुकिं नेवाः फिल्मया इज्जत थकायेत ग्वाहालि यात वा क्वकायेत ग्वाहालि यात जिं मसिउ। फिल्म जिगु विषय मखु, यद्यपि थुकी नं जिगु खायूगु, माकुगु अनुभव मदुगु मखु, व गुगुं मौकाय् प्वंके। थन बुद्ध धर्मया पटकथायात कयाः नेवाः फिल्म 'पटाचारा' जिगु सरोकार जू वःगु खः ।

बुद्ध धर्मया विषयवस्तुयात कयाः थ्वयां न्ह्यः 'चन्डालिका' दयेकूगु खः। चन्डालिका अछूत पात्रयात कयाः दयेकूगु फिल्म खः। थ्व फिल्म छगू हिसाबं लोकं हे ह्वाःगु खः, तर प्रोडुसरपाखें थ्व फिल्म जनताया चाहना अनुसार पित हयेगु कुतः याःगु खने मदु। छाय् खः मसिउ। लसताया खँ, थुगुसी २५५४ औं बुद्ध जयन्तीया लसताय् बौद्ध बाखनय् आधारित जुयाः गुण फिल्मस्पाखें 'पटाचारा' फिल्म झीत बिल। पटकथा, संवाद, निर्देशन रामकृष्ण खड्गीयागु। थुकिया मूलपात्र पटाचाराया अभिनय मेलिना मानन्धरं यानाच्वंगु दुसा, मिजं पात्र पटाचाराया भाःतया अभिनय कर्मां यानाच्वंगु दु। बौया अभिनय मदनदास श्रेष्ठ अले मांया अभिनय माया गिरीं। बाखं थुकथं न्ह्याइ - पटाचारा छम्ह साहुया म्ह्याय्, थःहे छेँया च्यः नाप यःत्यः जुइ। छेँनं बिसिउँ वनी। छथाय् किसानयाथाय् भिखाचा दयेकाः च्वनी। प्वाथय् दइ। लां दनी। मचा बुइकेत पटाचारां थःछेँ लुमंकी। थःछेँ वँवं दथुइ लँय् हे मचा बुइ। गुगु ग्याःचिकुं थःछँ वनेत स्वःगु खः, उकिं पार जुसेंलि पटाचारा थःछेँय् मवँसे भाःतलिसे हे दुःखसुख यानाः च्वनाः मचा ब्वलंकाच्वनी। हाकनं मेम्ह मचा लां दनी। अबलय् नं थःछेँ लुमंकी। भाःतम्हेस्यां लिगंक नं व तुकुतुकु न्यासिवने सःम्ह मचा ज्वनाः थःछेँ वनी। लँ दथुइ वाफय् वइ। उबलय् हे मचा बुइ। भाःतम्ह सर्पं न्यानाः लँय् हे सी। पटाचारा छम्ह मचा ब्यकुंच्यानाः, छम्ह मचा न्यासिकाः थःछेँपाखे स्वयाः वनी। लँ दथुइ खुसि छीमाः। छम्ह मचायात खुसि सिथय् तयाः ह्याउँमचा खुसिपारी तयेत खुसि छिना वनी। मचा पारी तयाः खुसि छिनाः वारीया मचा कायेत वइबलय् ह्याउँमचाय् मिखा ब्वयाः गिद्ध वइ। खुसिया दथुइ च्वंम्ह पटाचारा लाय्लाय् बुयाः गिद्धयात ख्यायेत स्वइ। तर गिद्धं मचा इमां दाया यंके थें यंकी। मेखे न्यासि वनेसःम्ह मचा आँटे चायाः मांम्हेसियाथाय् वयेत खुसि छीत स्वइबलय् वयात खुसिं चुइके यंकी। थुकथं पटाचारा निःसहाय जुइ। प्यखेरं ल्हाः वःगु पीर फये मफयाः विक्षिप्त जुइ। उइँ जूम्ह पटाचारा थःगु वसः दु, मदु हे चाइ मखु। आखिर बुद्धया चरणय् थ्यनी, बुद्धया करुणां मिखा चाली। भिक्षुणी जुया वनी ।

प्याखनय् पटाचारां बांलाक म्हिता तःगु दु। नायक जूम्ह न्हापा लिपा पर्दाय् मखनानिम्ह जूसां पत्याः मजुइक हे बांलाक म्हिता तःगु दु। बौ मदनदास व मां मायागिरीया अभिनय नं उलि हे च्वछायेबहः जू। निर्देशक व क्यामराया करामतं हे जुइमाः फिल्म बांलानाच्वंगु दु ।

थ्व बुद्धकालीन ऐतिहासिक घटना खः। तर श्राबस्ती छगू नां मकाःगु जूसा, बुद्ध व भिक्षुपिं मक्यंगु जूसा थ्व ऐतिहासिक धकाः ई महसुस मजू। छगू सफल सामाजिक फिल्म थें जक च्वन। क्लासिक अनुभूति जुइके कथंया डाईलग, बुद्धकालीन अनुभूति जुइकथंया भेषभुषा व दृश्य अन खने मदु। थ्व फिल्म 'बांलाःगु प्याखं, बांमलाःगु दबुली' क्यना च्वंगु थें महसुस जुल। पृष्ठभूमिया खँय् लोकेशनया खँय् उलि ध्यान बी मफुगु थें च्वं। कलाकारपिंत नेवाः पहः थूगु ला पाय्छि जू तर थ्व घटना गनं ज्यापु समाजय् जूगु मखुसें श्रावस्तीइ जूगु थें महसुस जुइकथंया संयोजन नं माः थें च्वं। श्रावस्तीइ कुँ वयाच्वंगु नं घटनास्थलं यक्व हे सतिकाः क्यनातल थें च्वन। शायद थ्व लो बजेटया कारणं जुल ला धइगु मति। मखुसा बुद्धया आशन म्हासुगु कापतं लायाः क्यनातःगु ला हे मल्वल। शायद पटकथा, संवाद, निर्देशन फुक्कं छम्हेस्यां हे जिम्मा काःगुलिं नं थथे जूगु ला? मध्यान्तरयां न्ह्यः पटाचाराया प्रेम प्रसंग अप्वः हे ताहाकः अले मध्यान्तर लिपा घटना याकनं न्ह्याःवंगु महसुस जू। समग्ररुपं थ्व फिल्म बांलाक स्यनातःगु प्याखं, बिना तयारीया मंचय् क्यंगु थें जुल। मखुसा कलाकार अभिनय कला व निर्देशकया निर्देशनयात ला च्वछाये हे माः। घटनां झीगु संवेदना व संवेकयात साला कायेफुगु दु। थुज्वःगु उपदेशमूलक फिल्म दयेकेत लगानी यानादीम्ह दिजेन्द्र शाक्ययात सुभाय् देछानाच्वना। आशा दु, कन्हय्या फिल्म झन् जक सुथां लाना वनी ।

More Stories Like this