थौं गुरु पुन्हि

लव कर्माचार्य

दछिया छकः पालंपाः वयाच्वनीगु थीथी झिंनिगू पुन्हि मध्ये थौंया पुन्हि खः दिल्ला पुन्हि। मेगु कथं धायेगु खःसा थौंया दिं कुन्हु गुरुयात पुजा याइगु जुयाः थुकियात गुरु पुन्हि नं धायेगु याः ।

चन्द्रमास कथं असार लाया असार फुइगु पुन्हि जुयाः थुकियात असार पुन्हि नं धाइ। अथेहे चन्द्रमास कथं साउन ला क्यनीगु जुयाः थौंया पुन्हियात साउन पुन्हि नं धाइगु न्यनेदु ।

आः थौंया पुन्हियात गुरुं शिष्यपिंत विद्या अध्ययन याकेगु, स्यनेगु, च्वकेगु, ब्वंकेगु कथं गुरु भाःपियाः गुरुयात हनाः पुजा याइगु जुयाः हे गुरु पुन्हि धयातःगु जुल। थुकियात खँय् भासं गुरुपूर्णिमा नं धायेगु याइ।
आः थें न्हापा विद्यालय, स्कूल धइगु मदुनिबलय् छेँखा छेँखाय् गुरु कुलय् निःशुल्क आखः ब्वंकेगु कथं याना वयाच्वंगुलिं गुरुयागु मेहनत, श्रम नये मत्यः धकाः थौंया न्हि कुन्हु पुजा यानाः थीथी सिसाबुसा, मरिचरी ग्वाः मसला तयाः गुरु पुजा याः वनाच्वनी ।

गुरुं नं शिष्यपिंत झ्वःलिं तयाः उमिसं ज्वना वःगु सफू व ग्वरः च्वसा आदि ब्वयाः उमिगु पुजा याकीगु चलन दु। न्हापां सफू ग्वरःयात निं पुजा याकी अले थःपिंसं पुजा कयाः थम्ह नं सफू ग्वरःया पुजा यानाः जाकि बियाः ज्वजलपा याकाः सफूयात भागि याकाः गुरुं नं आखः सयेमा धकाः आशिका बियाच्वनी। अले व पुन्हि कुन्हु आखः मब्वंकुसे विदा बिया छ्वइ ।

वहे न्हि कुन्हु हाकनं ग्वरः सफूयात दक्षिणा छायाः गुरुयात नं थःगु श्रद्धां दक्षिणा बीगु याइपिं नं दु। गुरुं शिष्यपिंत सिसाबुसा, मरि प्रसादया रुपय् बिया छ्वइगु नं चलन दु।
वहे कथं आः तक नं गनं गनं थौंया पुन्हि कुन्हु गुरु पुजा याः वनेगु चलन दनि। उकिं थौं गुरुयात पुजा याइगु जुयाः गुरु पुन्हि धयातःगु खः ।

थौंया न्हि कुन्हु पशुपति द्यःपाखें ख्वप दत्तात्रय द्यःयात गुरु पुजा याके छ्वयेमाः धइगु नं धापू दु ।

आः थौंया हे न्हि कुन्हु वज्राचार्य, बुद्धाचार्य, शाक्यपिनि गुरु नित्यनाथ धकाः नासः पुजा याकाः गुंलाबाजं स्यंम्ह कथं बाजं गुरुयात बाद्यवादन गुरु भाःपियाः भागियानाः गुंला पुन्हि निसें गुंला बाजं स्यं वनेगु याइगु चलन दु ।

न्हापा न्हापा शस्त्रअस्त्र विद्या स्यनातः कथं अर्जुनं द्रोणयात, द्रोणाचार्यं परशुरामयात थुकथं गुरु धकाः हनातःगु दु। अथे हे गुरु ब्यासयात पुजा हने कथं हनीगु जुयाः थौंया न्हियात गुरु ब्यास पुजा धकाः नं पात्रोय् उल्लेख यानाःतःगु दु ।

उकुन्हु वंगु ज्या पुन्हि तसकं ताःहाकःगु न्हि खः। थौंया
पुन्हि निसें न्हि चीहाकः व चा ताःहाकः जुया वनाच्वंगु दइ।
सौरमार कथं माघ संल्हूनिसें न्हि ताःहाकः व चा चीहाकः जुइ धाःथें सौरमास कथं साउन संल्हू नं न्हि चीहाकः व चा ताःहाकः जुयावनी ।

थौंया गुरु पुन्हिनं लछि लिपा गुंपुन्हि वइ। नेवाः संस्कृतिइ गुंपुन्हिया तःधंगु महत्व दु ।

More Stories Like this