अन्यौलया लबः मेगु तत्वं मकायेमा

प्रधानमन्त्री ल्ययेगु लागिं जूगु निगूगु चरणया मतदान नं विफल जुइवं देय्या राजनीति झन हे अन्यौलग्रस्त जूवंगु दु। राजनीतिक पार्टीतय्गु सत्ताया लोभं यानाः प्रधानमन्त्री ल्यये मफुगु छगू दुःखया खँ ला ख हे खत, उकिया नापनापं देय्या थ्व राजनीतिक अन्यौलयात कयाः मेमेगु तत्वतय्सं फाइदा काइगु खः लाकि धइगु ग्याःचिकु धाःसा हानं मेगु थासं ब्वलना वयाच्वंगु दु। व छु धाःसां पार्टीत थःपिंसं देय्या कार्यकारी ज्या याइम्ह प्रधानमन्त्री ल्यये मफुगु कारणं आः राष्ट्रपतियात सक्रिय यायेगु खः लाकि धइगु बिचाः तइपिं मनूत न्ह्यःने पिहां वःगु दु। उमिसं सभामुख सुभाष नेम्बाङयात राष्ट्रपति समक्ष पौ च्वयाः देय्या राजनीतिक संकटया निकास पिकायेत इनाप याःसां जिउ धकाः सुझाव बीगु याना हःगु हुइनाभुइना पिहां वःगु दु। खतुं सभामुख नेम्बाङ थः हे छम्ह स्वच्छ व लोकतन्त्रयात थूम्ह व्यक्तित्व जूगु कारणं वय्कलं अज्याःगु मूर्खतापूर्ण ज्या यानादी मखु जुइ। तर देय्या वर्तमान राजनीतिक माहौलं यानाः राष्ट्रपतियात सक्रिय यायेमाः धइगु बिचाः गुगु पिहां वल, व धाःसा निश्चत नं सोचनीय विषय खः। राष्ट्रपति जक मखु थ्व इलय् ला पुलांम्ह जुजु ज्ञानेन्द्रं तकं आः थःपिंसं छुं भूमिका म्हितेगु ई त्यल ला धकाः बिचाः याना हःगु दयेमाः। लोकतन्त्र कमजोर जुया वन धाःसा उकियात प्यखेरं आक्रमण शुरु जुया वइगु अस्वाभाविक मखु। अले लोकतन्त्रयात कमजोर यायेगु थ्व ज्या पिनें जुयाच्वंगु मखुसें थ्वहे देय्या जिम्मेवार नेता व राजनीतिक दलतपाखें जुयाच्वन। थ्व खायुगु पक्ष खः। देय्या जटिल राजनीतिक अवस्थायात थुइकाः दलतय्सं तुरुन्त सहमति यायेमाःगु दु ।

More Stories Like this