गुरुया उपदेश थुइकेमाःगु आवश्यकता

शिशिल चित्रकार

थौं राजनीतिक, शैक्षिक, प्रशासनिक, आर्थिक, स्वास्थ्य, न्यायिक, व्यापारिक, औद्यौगिक आदि क्षेत्रय् थज्याःपि गुरु ला मदु, विद्यार्थी गय् यानाः दइ?

असार पुन्हि, गुरु पुन्हिया महत्व उपादयेताकथं झीगु न्ह्यःने हानं छक्वः गुरु पुन्हि वःगु दु। थ्व पुन्हि थीथी सम्प्रदायतय्सं थीथी हे कथं माने याना वयाच्वंगु दुसा बौद्ध धर्मावलम्वीतय्गु लागिं बैशाखं वइगु स्वांयाः पुन्हि थें तुं हे थ्व पुन्हि नं उलि हे महत्वं जाःगु तःधंगु पर्व खः। थ्व असार पुन्हि कुन्हु भगवान् गौतम बुद्धं बोधिज्ञान प्राप्त यायेवं हे न्यान्ह शिष्यपिंत न्हापांगु धर्मचक्र प्रवचन यानाबिज्याःगु दिं खः। थ्व न्हि धइगु भगवान् गौतम बुद्धया शिक्षा, मध्यम प्रतिपदामार्ग, आर्य अष्टाङ्गिक मार्ग, चार आर्यसत्यया प्रवचन बियाबिज्याःगु दिं खःसा उकिया कारणं हे विश्वय् बुद्ध शिक्षाया प्रचार प्रसारया मार्ग प्रशस्त जुया वंगु खँय् शंका मदु।

देशया थीथी ख्यलय् जुयाच्वंगु समस्या धइगु थीथी ख्यःया जनमत दुथ्यानाच्वंगु मतिभ्रम, गलत शिक्षा, गलत आदर्श, गलत चेतना, गलत मनोवृत्ति, गलत कार्य, गलत नीति, गलत कार्यक्रम, गलत मापदण्ड, गलत सूचना, गलत न्याय, गलत निर्णय, गलत स्तरया मापन आदि गल्ती गल्तीया हे लिच्व खः धकाः गथे मधायेगु? देय्या थीथी ख्यलय् गलत आदर्श, गलत शिक्षा, गलत उदाहरण, गलत ज्या यायेगु धेधेबल्लाः जुयाच्वंतले समाज, देश व विश्वया अवस्था स्यनीगु सिबें समाधानया लँपुइ वनी कथं पलाः न्ह्याना वनी धकाः धाये फइ मखु। देय्या थीथी ख्यः, राजनैतिक, सामाजिक, आर्थिक, न्यायिक, प्रशासनिक, शैक्षिक, व्यापारिक, औद्योगिक आदि ख्यःया जिम्मेवार पदाधिकारीतय्सं तत्तत् ख्यंलय् उच्चतम आदर्शयुक्त ज्या यानाः छम्ह गुरुयाके दयेमाःगु फुक्कं गुण विकास यानाः मेपिंत बांलाःगु उदाहरण क्यने फयेके मागु दु। उकिं दक्व ख्यःया व्यक्तितय्के आदर्शम्ह गुरुया गुण दयेकेगु, स्यना काइपिंसं नं खःगु, भिंगु शिक्षा नाला कायेगु, मखुगु बांमलाःगु शिक्षा मकासे भिंम्ह गुरु माः वनेगु ज्या यायेमाःगु दु। थौं राजनीतिक, शैक्षिक, प्रशासनिक, आर्थिक, स्वास्थ्य, न्यायिक, व्यापारिक, औद्यौगिक आदि क्षेत्रय् थज्याःपि गुरु ला मदु, विद्यार्थी गय् यानाः दइ?

थौं विश्व हे भयावह अवस्थाय् लानाच्वंगु स्थितिइ वसपोल भगवान् गौतम बुद्धया शिक्षाया झं हे मू दयावल धकाः विश्व जनमतं सः थ्वयेका हःगु वाःचायेके फु। वसपोल भगवान् गौतम बुद्धया शिक्षा धइगु हे मनूतयगु मानसिक चेतना, चित्त शुद्धिया उपाय सहित कुशल ज्या यायेगु खः। खालि आखः जक ब्वनां मनू पारंगत जुइगु मखुसें यथाभूत ज्ञान दर्शन कायेया लागि प्रयत्नशील जुइमाःगु दु। वसपोलया शिक्षाया प्रतिफल थुइका कायेया लागिं थम्हं हे उपाय यानाः उकिया मू ध्वाथुइकेमाः। थुकिया लागिं हे धाःगु खः यथाभूतं ज्ञानदस्सनं सुविसुद्ध अहोसि।

थौंयागु भयावह सामाजिक, आर्थिक, राजनैतिक, न्यायिक, शैक्षिक, व्यापारिक, औद्यौगिक आदि ख्यलय् जुइपिं मनूतय्सं थः थम्हं कुशल ज्या यायेगुपाखे उत्पेरित जुइमाःगु दु अले भगवान् गौतम बुद्धयात महान गुरु नाला कासें वसपोलया शिक्षायात जीवनय् छ्यलाः, छम्ह सच्चा विद्यार्थी जुइमाःगु दु। वसपोलया शिक्षा कथं लोकचक्र हे दुःख ख, रोग खः, बन्धन खः, खिति खः, मि खः, भय खः, दुष्फल खः, दुर्गति खः, अले धर्मचक्र हे सुख खः, स्वस्थता खः, शान्ति खः, मुक्ति खः, निर्मलता खः, सुफल खः, सुगति खः। चार आर्य सत्ययात खंकेफुगु धर्मचक्र खःसा थुकियात खंके मफुग हे लोकचक्र खः। (साभार: सत्यनारायण गोयन्का, जागे मंगल पेरणा, (हिन्दी) पृ. १९२) थनथाय् लाक्क धम्मपदया छगू श्लोक तयेगु पाय्छि जुइ: मा पमादमनुञ्जेथमा कामरनिसन्थव।
अप्पमत्तो हि झायन्तो�पप्पोति विपुलं सुख।।
अर्थ: प्रमादी जुइमते, पञ्चकामगुणें आसक्त जुइ मते। अप्रमादी जुयाः ध्यान यात धाःसा तःधंगु सुख प्राप्त जुइ। (२७)
व्यक्तिं थःगु कर्मं भिंगु ज्या मयासे ईन्द्रीय सुखया लागि (बस्तुत दुःखया हुनिं) मभिंगु, अकुशल ज्याया लिधंसा कया जुल धाःसा समाज प विश्व मभिनीगु ला जु हे जुल व्यक्ति स्वयंया लागिं नं दकलय् तःधंगु हानी जुइगु निश्चित खः। मनूत थःगु मभिंगु ज्या कर्मया फलपाखें विमुख जुइ फइ मखु। मनूतय्सं गल्ति त्वपुयाः वा छथासं मेथाय् जुयाः बचे जुइ फइ मखु। हानं छगू मेगु धम्मपदया श्लोक मनन् यायेगु बांलाइ:

ने'तं खो सरणं खेमं-ने'तं सरणंमुत्तमं।
ने'तं सरणमा'गम्म-सब्ब दुक्खा पमुच्चति।।

अर्थ: मनुष्यपिं भययागु कारणं पर्वत, वन, उद्यान, वृक्ष, चैत्यादियागु शरणय् वनी। थुकियागु शरणय् वनाः भयं छुटे जुइ नं मखु। थ्व उत्तमगु शण नं मखु। थुकियागु शरणय् वनाः फुक्क दुःखं छुट जुइ नं मखु।

थं देश समाजया भयावह अवस्था पारया लागि, महान गुरु बुद्धया शिक्षा नाला कयाः छम्ह भिंम्ह विद्यार्थी जुइमाःगु दु। थौंया गुरु पुन्हिया सार्थकता पूवंके कथं न झीत थुकिं माःगु पेरणा दयेमा धइगु कामना यासें समाज विश्वया शान्तिया लागि मनूतय्गु कुशल कर्म ज्या यायेगुपाखे न्ह्याः वनेगु कुतः जुइ फयेकेमाः । दक्व प्राणीपिनि कल्याण जुइमाः।

More Stories Like this