मधेशी मोर्चालिसे वार्ता जारी
मोर्चां कांग्रेसयाके लिखित प्रतिवद्धता फ्वन
येँ(सन्ध्या टाइम्स)/प्रधानमन्त्री ल्ययेगु स्वंगूगु चरणया चुनावय् थःत मत बीत इनाप यासें नेपाली कांग्रेस व एकीकृत माओवादीं थौं नं मधेशी मोर्चालिसे वार्ता न्ह्याकूगु दु। थौं सुथय् नेपाली कांग्रेसया नेतातय्सं मोर्चालिसे खँ न्ह्याकूगु खःसा न्हिनय् हानं माओवादीं नं मोर्चालिसे वार्ता यायेत्यंगु दु।
सूत्रं जानकारी बिउगु जानकारी कथं मधेशी मोर्चां न्ह्यःने हयाच्वंगु मागयात संवोधन यायेत थःपिं तयार दु धकाः कांग्रेसं आश्वासन बिउगु दु। तर मधेशी मोर्चां थःपिनि माग संवोधन जुइगु लिखित बचं वयेमाः धकाः माग याःगु दु। लिखित बचं बीगु खँय् धाःसा कांग्रेस लिचिलाच्वंगु दु।
थौं न्हिनय् माओवादीलिसे जुइगु वार्ताय् नं मधेशी मोर्चां थज्याःगु हे सर्त न्ह्यःने तइगु खँ दु।
सूत्रया कथं मोर्चां थःपिनि माग संवोधन जुइमाःगु सर्तया नापनापं सरकारय् थःपिनि हिस्सायात कयाः नं दावी यानाच्वंगु दु। उमिसं कम से कम नं निम्ह उपप्रधानमन्त्रीया नापनापं गृह, परराष्ट्र थेंज्याःगु मन्त्रालय नं थःपिंत माः धकाः माग यानाच्वंगु दु।
मधेशी मोर्चाय् आवद्ध पार्टीत थुगुसी मोर्चाया अडानय् कायम जुयाच्वंगु धाःसा अजूचायापुगु खँ खः धयाहःगु दु।
नेपाली कांग्रेसं एमालेलिसे नं समर्थनया लागिं वार्ता जारी यानाच्वंगु दनि।
एमालेय् तीव्र दवाव
मतदानय् तटस्थ च्वनेगु धकाः निर्णय यानातःगु एमाले दुने कांग्रेसया पक्षय् मत बीत दवाव वःगु दु। थ्व बारे निर्णय यायेत याकनं केन्द्रीय बैठक च्वने माल धकाः खड्ग ओली पक्षं इनाप यानाच्वंसां अध्यक्ष झलनाथ खनालं धाःसा थ्व बारे खँ ल्हायेत बैठक सःतेत तकं अस्वीकार यानादीगु दु।
प्रमया चिन्ता मेगु हे
सरकार दयेकेत दलत ब्वाँय् वनाच्वंगु इलय् कामचलाउ प्रधानमन्त्री माधव नेपालं धाःसा छुं जुयाः स्वंगूगु चरणया मतदानं नं प्रम ल्यये मफुत धाःसा छु यायेगु धकाः खँ ल्हायेत वय्कलं थीथी दलया नेतातलिसे परामर्श यानादीगु दु। म्हिगः वय्कलं राष्ट्रपतिलिसे थ्व बारे खँ ल्हानादीगु खःसा थौं राप्रपा आदिलिसे खँ ल्हानादीगु दु।
