येँ मनपा व संघर्ष समति दथुइ ७गू बुँदे सहमति

येँ महानगरपालिका व नेवाः स्वायत्त राज्य मंकाः संघर्ष समिति दथुइ ७गू बुँदे सहमति जूगु दु । आइतवाः महानगरपालिकाया बागदरवार स्थित ज्याकूथी महानगरपालिकाया कार्यकारि अधिकृतया उपस्थिति जूगु वार्ताय् महानगरपालिकापाखें थ्वहे आर्थिक दँनिसें म्हयेगु कथं क्वःछिनातःगु छेँबुँया कर सेवा शुल्क व दस्तुरयात ई कथं हीकेत व भिंकेत संघर्ष समितियापाखें च्वयाः बीगु सुझावया लिधंसाय् सहलह यायेगु सहमति जूगु दु ।

अथेहे कामपा ज्याकूथीया ज्याकःमिपिन्त नेपालभाषां च्वयेब्वने व न्ववाये सयकेबीकेत कामपां न्हापांगु नेपालभाषा प्रशिक्षण कक्षा थ्वहे स्वला दुने क्वचायेकेगु व प्रशिक्षित ज्याकःमिपिन्त दुनेया शहरी क्षेत्रया वडा ज्याकुथिइ सचिवया भाला बियावं यंकेगु, कामपां अनुमति बियातःगु विज्ञापन व होर्डिङ्ग बोर्डय् नेपालभाषा छ्यल धाःसाः अज्याःगु विज्ञापन बोर्डय् २५ प्रतिशत व नेपालभाषाया लिपित छ्यलधाःसाः ५० प्रतिशत कर छुट बीगु, महानगरपालिकापाखें पितबीगु फुक्क सार्वजनिक सुचंत स्थानीय स्तरया पत्रिकाय् नेपालभाषां नं पिथनेगु सहमति जुगू दु ।

महानगरपालिकाया राजनीतिक संयन्त्रया दुजःत नं उपस्थित दुगु वार्ताय् कामपा दुने नेवाः संस्कृति सम्पदा सम्बन्धी छगू विभाग नीस्वनेगु, कामपा दुने विशेष नेवाः डेस्क चायेकेगु व नेवाः जात्रा, पर्व, संस्कृति वापत कामपां दँय् दसं याइगु खर्चया सम्बन्धय् जात्रा पर्वतया धलः, तिथि, मिति व जात्रा याइगु पुचः, गुथि, जाती व उकियात माःगु खर्चया विवरण व श्रोतवारे प्रतिवेदन दयेकेत छगू ज्यासना पुचः नीस्वनेगु व उगु पुचयात छवाःयादुने प्रतिवेदन न्ह्यब्वयेत ई बीगु सहमति जूगु दु ।

नापं महानगरपालिका असमावेशीय तरिकां न्हूपिं कर्मचारीत भर्ना यायेगु प्रकृयायात स्थगित यायेगु निर्णययात यथावत तयेगु मौखिक सहमति नं जूगु दु ।

सहमति लिपा संघर्ष समितिया नायः मंगल महर्जनं महानगरपालिका व संघर्ष समिति दथुइ ७गू बुँदे सहमति जूगु व उगु सहमति याकनं कार्यन्वयन यायेत नगरपालिकां बचं ब्यूगु खँ नेपालमण्डल डट कमयात कनादिल । वयक्लं थ्व सहमति नापं संघर्ष समितिं ६गू बुँदे माग तयाः यानावःगु आन्दोलन थौंया मिति निसें स्थगित यानागु कनादिसें महानगरपालिकां थौं जूगु सहमतिया बुँदात कार्यन्वयन मयाःसा संघर्ष समिति छुं नं इलय् हानं संघर्षय् कुहांवयेफुगु धयादिल ।

येँ महानगरपालिका व नेवाः स्वायत्त राज्य मंकाः संघर्ष समिति दथुइ जूगु ७गू बुँदे सहमति

थौं मिति ११३० दिल्लाथ्वः १५ २०६६ साउन ९ गते येँ महानगरपालिकाया ज्याकू बागदरवारया बोर्ड हलय् कामपा कार्यकारी अधिकृत दलीय संयन्त्रया दुजःपिं व नेवाः स्वायत्त राज्य मंकाः संघर्ष समितिया प्रतिनिधिपिनि दथुइ जूगु सहलहस क्वय् न्ह्यथना कथंया न्हय्गू बुँदाय् सहमति जूगु दु ।

सहमतिया बुँदात :
१. महानगरपालिकापाखें थ्वहे आर्थिक दँनिसें म्हयेगु कथं क्वःछिनातःगु छेँबुँया करसेवा शुल्क व दस्तुरयात ईकथं हीकेत व भिंकेत नेवाः स्वायत्त राज्य मंकाः संघर्ष समितियापाखें च्वयाः बीगु सुझावया लिधँसाय् सहलह यायेगु क्वःजित जुल ।

२. कामपा ज्याकूथीया ज्याकःमिपिन्त नेपालभाषां च्वयेब्वने व न्ववाये सयकेबीकेत कामपां न्हापांगु नेपालभाषा प्रशिक्षण कक्षा थ्वहे स्वलाः दुने क्वचायेकेगु व प्रशिक्षित ज्याकःमिपिन्त फ्रन्ट लाईन सेवा दुने शहरी क्षेत्रया वडा ज्याकुथिइ सचिवया भाला बियावं यंकेगु सहमति जुल ।

३. कामपां अनुमति बियातःगु विज्ञापन व होर्डिङ्ग बोर्डय् नेपालभाषा छ्यल धाःसाः अज्याःगु विज्ञापन बोर्डय् २५ प्रतिशत व नेपालभाषाया लिपीत छ्यलधाःसाः ५० प्रतिशत कर छुट बीगु सहमति जुल ।

४. महानगरपालिकापाखें पितबीगु फुक्क सार्वजनिक सुचंत स्थानीय स्तरया पत्रिकाय् नेपालभाषां नं पिथनेगु सहमति जुल ।

५. नेवाः समुदायया सांस्कृतिक सम्पदा थपु यायेत व म्वाका तयेत कामपादुने नेवाः संस्कृति सम्पदा सम्बन्धी छगू विभाग नीस्वनेत सहमति जुल ।

६. कामपा ज्याकू दुने थनया आदिवासी नेवाः समुदायया सेवाग्राहीतय्त ध्यानय् तयाः विशेष नेवाः डेस्क चायेकेगु सहमति जुल ।

७. नेवाः जात्रा पर्व संस्कृति वापत कामपां दँय् दसं याइगु खर्चया सम्बन्धय् जात्रा पर्वतया धलः तिथि मिति व जात्रायाइगु पुचः गुथि जाती व उकियात माःगु खर्चया विवरण व श्रोतवारे प्रतिवेदन दयेकेत छगू ज्यासना पुचः नीस्वनेगु अले उगु पुचलं छवाःयादुने प्रतिवेदन न्ह्यब्वयेगुया नापनापं उकि सहलह ब्याकाः माःगु खँ क्वःछिइत सहमत जुल ।

आनन्द राज पोखरेल, कार्यकारी अधिकृत, येँ महानगरपालिका
मंगल महर्जन, अध्यक्ष, नेवाः स्वायत्त राज्य मंकाः संघर्ष समिति

More Stories Like this