थौं नं प्रम मल्यःसा छु जुइ?
राष्ट्रपति न्ह्यःने हयेमाःगु छथ्वःसिया बिचाः
येँ (सन्ध्या टाइम्स)/प्रधानमन्त्री ल्ययेगु लागिं थौं जुइगु निगूगु चरणया मतदानय् नं सुनां हे बहुमत काये मफइगु निश्चित जूगु दु। एमालें तटस्थ च्वनेगु धकाः निर्णय यानातःगु व मेखे मधेशवादी दलतय्सं नं कडा सर्त न्ह्यःने तयाः बार्गेनिङ्ग शुरु याःगुलिं प्रधानमन्त्रीया चुनावय् ब्वति कयाच्वंपिं माओवादीया पुष्पकमल दाहाल व कांग्रेसया रामचन्द्र पौडेल निम्हेस्यां नं बहुमत खाके फइगु सम्भावना मदुगु खः ।
थौं नं सुनां नं बहुमत खाके मफुत धाःसा वयां लिपा छु याये माली धकाः सहलह यायेत सभामुख सुभाष नेम्बाङं थौं हे दलतय्गु छगू बैठक सःतादीगु दु। वहे बैठकं आः छु यायेगु धकाः निर्णय याइगु खँ धाःगु दु। यदि थौं नं सुनां हे बहुमत खाके मफुत धाःसा चुनाव सम्बन्धी नियम कथं हानं मेगु चरणया मतदान जुइ। राजनीतिक पार्टीतय् अडानं यानाः न्ह्याक्व हे मतदान याःसां नं प्रधानमन्त्री धाःसा ल्यये फइगु स्थिति मदुगु जुयाः थुकियात गय् यानाः अन्त यायेगु धइगु बारे थन थीथी कथंया बिचाःत न्ह्यःने वयाच्वंगु दु ।
छगू विशिष्ट सूत्रं बिउगु जानकारी कथं यदि थौंया मतदानं नं निकास पिहां मवल धाःसा सभामुखं राष्ट्रपतियात हे पौ च्वयाः निकास लुइका बी माल धकाः इनाप यायेमाःगु सुझाव वयाच्वंगु दु। यदि सुनां हे बहुमत काये फइगु अवस्था मवल धाःसा थ्व इलय् राष्ट्रपतियात हे न्ह्यःने हयेगु बाहेक मेगु विकल्प मदु धाइपिं नं पिहां वःगु दु।
तर म्हिगः बीबीसी नेपाली सेवालिसे खँ ल्हासें सभामुख सुभाष नेम्बाङं थम्हं राष्ट्रपतियात अज्याःगु छुं नं पौ मच्वयेगु खँ धयादीगु दु। लिसें वय्कलं राष्ट्रपतियात समेत विनम्र इनाप यासें देशय् ब्वलंगु थ्व संकट समाधान यायेगु ज्याय् राष्ट्रपतिया छुं हे भूमिका दइ मखु धकाः नं लुमंका बियादीगु दु। राष्ट्रपतिपाखें थ्व इलय् थःगु भूमिका मालाच्वंगु जुइफु धइगु शंका यासें वय्कलं थ्व 'आग्रह' यानादीगु सूत्रया दावी दु। सभामुख नेम्बाङं थ्व समस्या दलत थःपिं हे जानाः समाधान याइ व नियमं नं थथे धाइगु खँ नं स्पष्ट यानादिल ।
उखे कांग्रेसं थःपिं महाधिवेशनय् व्यस्त जुइमाःगुलिं प्रधानमन्त्रीया चुनाव मेगु निवाः ति सारे याये माली धकाः सदनयात इनाप यायेत्यंगु खँ नं सूत्रं धाःगु दु ।
मेखे थौं जुइगु प्रमया चुनावय् ब्वति कयाच्वंपिं उम्मेदवारत भोट फ्वनेत थौं नं ब्वस्त जुयाच्वंग दनि ।
