दलतय्के थौं सद्बुद्धि वयेमा

न्हूम्ह प्रधानमन्त्री ल्ययेत म्हीग जूगु मतदान विफल जुइवं थौं हानं निगूगु चरणया मतदान जुइत्यंगु दु। तर थौं सुथय् तकया अवस्था स्वयेगु खःसा थौं जुइगु मतदानं नं प्रधानमन्त्री ल्यये फइगु स्थिति मदुनि। सदनया स्वंगूगु तःधंगु पार्टी एमाले व प्यंगूगु तःधंगु शक्ति मधेशी मोर्चां मतदानय् थःपिं तटस्थ च्वनेगु धकाः निर्णय यानातःगु कारणं प्रधानमन्त्रीया उम्मेदवार जुयाच्वंपिं निम्हं नेतातय्त थौं नं बहुमत दइगु सम्भावना मदु। छुं जुयाः थौं नं प्रधानमन्त्री ल्यये मफुत धाःसा वयां लिपा छु यायेगु धइगु खँ धाःसा अझं अन्यौल तिनि ।

खतुं थःगु मत सुयात बीगु धकाः निर्णय यायेगु स्वतन्त्रता फुक्कं दलतय्त दु। तर देशय् सरकार हे मदइगु अवस्था वयेकाः तक नं जिमिगु मत सुयातं बी मखु धकाः तटस्थ च्वनेगु छुं नं जिम्मेवार पार्टीयात ल्वःगु खँ खः ला? थःत मेपिंसं मत बीगुसा बिउ मखुसा थःपिंसं नं सुयातं मत बी मखु धायेगु पाय्छि जुइ ला? थ्व गुगुं नं जिम्मेवार पार्टीं याइगु ज्या मखु। छखे दुगु सरकारं राजीनामा बियातःगु अवस्था, मेखे सुयाकें बहुमत मदुगु स्थिति। थज्याःगु इलय् देय्यात सरकारविहिन याना तयेगु पाय्छि खँ मखु। थुकिं ला कि न्हूगु चुनावय् वनेमाःगु अवस्था हया बी। कि मखुसा राष्ट्रपतियात सक्रिय यायेमाःगु स्थिति सिर्जना जुया बी। गुगु निगुलिं पाय्छि खँ मखु। संविधान दयेकेगु धकाः गठन जूगु संविधानसभायात सरकार दयेकेगु खँय् हयाः अवरुद्ध याना तयेगु झन् हे मिले जूगु खँ मखु। राजनीतिक पार्टीतय्सं थौं हे सद्बुद्धि पिकयाः छगू स्पष्ट निकास लुइके माःगु दु। मखुसा देशय् जुइगु छुं नं तःधंगु दुर्घटनाया जिम्मा कायेत नं उपिं तयार जुयाच्वंसां जिउ ।

More Stories Like this