झलनाथ दुई तिहाईपाखे
माओवादीया समर्थन नं खनालयात हे / कांग्रेस, फोरम-लो. व तमलोपा विपक्षय् / थौं न्हिनय् २ बजे लिपा मतदान
येँ (सन्ध्या टाइम्स)/दुइ तिहाई बहुमत दुसा जक सरकार गठन यायेगु निर्णय यासें प्रधानमन्त्रीया धेंधेंबल्लाखय् कुहां वःम्ह एमाले अध्यक्ष झलनाथ खनालं दुई तिहाई मत हे प्राप्त याइगु सम्भावना अप्वया वंगु दु ।
न्हिनय् १.३० बजे तक प्राप्त जानकारी कथं खनालयात ३९० मत प्राप्त जुइधुंकूगु दु। दुई तिहाईया लागिं ४०१ मत माः। थुकी उपेन्द्र यादवया मधेशी जनअधिकार फोरम नं सहभागी जुइ सातकि वय्कःयात माःगु ४०१ मत खाः वइगु निश्चित जुइ। खनालयात नेपाली कांग्रेस बाहेक तमलोपा व लोकतान्त्रिक फोरमं धाःसा समर्थन मयाइगु जूगु दु ।
संसदया तःधंगु दल खयां नं थःगु पक्षय् बहुमत खाइगु सम्भावना मदयेवं एकीकृत माओवादीं एमाले नेता खनालयात हे समर्थन याइगु जूगु दु। खनालयात थःगु समर्थन दइ धकाः न्हापांगु पौ हे माओवादीं बिउगु खः। वयां लिपा थीथी मधेशवादी दल व चिचीधंगु दलया नं समर्थन दयाः खनालं ४०१ स्वयां अप्वः मत काये फइगु सम्भावना अप्वया वंगु दु ।
एमालेया थःगु मत धइगु १०९ खःसा एकीकृत माओवादीं दुईतिहाई दइगु जुल धाःसा समर्थन यायेगु जुइ धकाः औपचारिक पौ बिउगु खः। माओवादीया २३५ मत दु। माओवादीं चुनावी प्रक्रिया शुरु जुइ न्ह्यः हे थःपिं नापं दुथ्याकाः दुईतिहाई बहुमत क्यनेमाःगु, अथे जुल धाःसा फुक्कं मत बीगु जुइ धकाः सर्त तःगु दु। अथे हे मधेशी जनअधिकार फोरमं नं दुई तिहाइ दइगु जुल धाःसा खनालयात समर्थन यायेगु धाःगु खः ।
फोरमयाके मत २५ दु। अथे हे नेपाल सद्भावना पार्टी आनन्दीदेवी, राष्ट्रिय जनमोर्चा नेपाल, नेकपा (संयुक्त), नेकपा (एकीकृत), नेकपा (माले), नेपाली जनता दल, नेपाः राष्ट्रिय पार्टीपाखें नं समर्थन यायेधुंकूगु दु ।
थ्व ल्याखं न्ह्याः वन धाःसा एमालेया नेतृत्वय् दुईतिहाइ बहुमतया सरकार दयेके फइगु खँ थन धया हःगु दु। एमालेया म्हिगः च्वंगु केन्द्रीय कमिटीया बैठकं दुईतिहाई बहुमतया सरकारया नेतृत्व याये फत धाःसा जक सरकार गठन यायेगु, यदि अथे याये मफुत धाःसा चुनावय् तकं ब्वति मकायेगु धकाः निर्णय याःगु खः ।
माओवादीं थौं सुथय् तक थःगु हे नेतृत्वय् बहुमतया सरकार दयेकेगु कुतः यानाच्वंगु खःसां खनालया पक्षय् दुई तिहाई बहुमत खाइगु सम्भावना खने दयेवं सरकार गठनया कुतः त्वःतेधुंकूगु दु। माओवादीं थःगु नेतृत्वय् सरकार गठन जुल धाःसा स्वलाया दुने वाइसीएलया अर्धसैनिक संरचना भंग यायेगु, सेना समायोजन यायेगु, कब्जा यानातःगु छेँबुँ लित बीगु व सरकारय् एमाले व कांग्रेसयात नं दुथ्याकाः संयुक्त राष्ट्रिय सरकार दयेकेगु नापं संविधान निर्माण यायेगु खँ पित हःगु खः ।
झलनाथ खनालयात दुई तिहाई खाके बीगु ज्या न्ह्यानाच्वँच्वं हे मधेशी मोर्चां थःपिनि मत तटस्थ जुइफुगु सम्भावना नं क्यना हःगु खँ धाःगु दु। अथे जुल धाःसा प्रचण्डया सम्भावना अप्वयेफु ।
