सरकार गठनय् वयाच्वंगु अनिश्चितता

देय्या न्हूम्ह प्रधानमन्त्री ल्ययेगु लागिं थौं संसदय् मतदान याइगु ज्याझ्वः दयेकूगु दु। तर मतदान थौं जुइगु जूसां भावी सरकारया नेतृत्व धाःसा सुनां याइ धइगु खँ धाये फयाच्वंगु मदुनि। न्हूगु सरकारया नेतृत्व तःधंगु स्वंगू दल मध्ये छगुलिं याइगु निश्चित दुसां स्वंगुलिं हे दलया नेतातय्सं प्रधानमन्त्रीया उम्मेदवारी दर्ता याःगु कारणं विजयी जुइम्ह सु धइगु खँ धाःसा सी मदयाच्वन ।

थौं मतदान याइगु जूसां सरकारया नेतृत्व याइम्ह सु धइगु सी मदुगु धाथें नं विडम्बनापूर्ण खँ खः। सुं हे दलत थःगु बाहेक मेपिनि नेतृत्व माने यायेत तयार मदु धइगु खँ थुकिं स्पष्ट याना बिउगु दु। थज्याःपिं नेतातय्सं सहमतिया सरकार दयेके मफइगु निश्चित खः। तर थौं सहमतिया जक मखु बहुमतिया सरकार तकं दयेके मफइगु अवस्था वयाच्वंगु दु। लोकतन्त्रय् गुगु दलं दकलय् अप्वः मत हइ वं हे सरकार गठन याये दये माःगु खः। तर नेपाःया राजनीति थौं थज्याःगु भद्रगोल जुयाच्वंगु दु कि ३०० मत कयाः दयेकेमाःगु सरकार १०० सीट दुगु पार्टीं तकं जिं दयेके धकाः लगे जुयाच्वंगु दु। बहुमतयात कदर यायेगु परम्परायात पूर्ण रुपं हे थुकिं नकारे याःगु दु। देशय् वःगु लोकतन्त्रया थ्व तःधंगु हे उपहास खः। वास्तवय् दलतय्सं थःगु आकारयात हे वास्ता मयासे सरकार दयेके धकाः कुतः यानाच्वंगु कारणं थ्व स्थिति वःगु खः। राजनीतिक दलत थ्व इलय् थुभनं सरकार दयेकेत लगे जुयाच्वंगु दु मानौं थ्व देशय् सरकार दयेकेगु धइगु थ्वहे अन्तिम खः। थ्वयां लिपा सरकार धइगु हे गबलें दयेके खनी मखुत धइथें दलत लगे जुयाच्वंगु वास्तवय् उमि दुने सुलाच्वंगु पदलोलुपताया ज्वलन्त दसि खः ।

More Stories Like this