तुलसी पीगु एकादशी

लव कर्माचार्य

दछिया छक्वः वइगु २४ गू एकादशी मध्ये थौंया एकादशी खः। तुलसी पीगु एकादशी। थ्व सिबें न्ह्यः तुलसी पु ह्वलीगु एकादशी थें थौं तुलसी पीगु एकादशी जुल। गथे जेठं वा पुसा तइ, असारं पु वामां ज्वनाः वा पी थें थौं बुया वःगु तुलसी मा छथासं मेगु थासय् सारय् यायेगु धइगु तुलसी पीगु एकादशी धकाः धायेगु याइ ।

आः थौंया एकादशी तुलसी पीगु जक मखुकि चतुर्मास लगे जुइगु प्यलाया एकादशी नं थौं खः। थ्व प्यलायात चतुर्मास छाय् धाःगु धइगु खँयात स्वयेगु खःसा भगवान विष्णु शेष शैय्याय् ग्वतुलाः शयन जुयाबिज्याःगु प्यला तकया ई जुयाः थौंया एकादशीयात हरिशयनी एकादशी नं धाइ।
अथे जुयाः थौंया एकादशीयात नेपाःमिपिंसं तःधंगु एकादशी कथं नं नाला वयाच्वंगु दु। छाय्धाःसा थौंया एकादशी कुन्हु न्या, ला, अय्लाः जक मखु न्हिछि छुं हे मनसे च्वना च्वनेमाःगुलिं थुकियात तःधंगु एकादशी धया तःगु खः ।

थ्व एकादशी दछिया नीप्यंगू मध्ये दिल्लाया हरि न्ह्यः वयेकीगु, यंलाया हरि मू पुलीगु व कछलाया हरि न्ह्यलं चाइगु एकादशी मध्ये छगू खः ।

थ्व चतुर्मास गबलें गुगुं दँय् न्याला नं क्यं वयेफु। थ्व न्यालां क्यनीगु धइगु हे व दँय् पुरुषोत्तम अनला, गुंला, यंला व कौलाया दुने अनला च्वं वल कि न्याला क्यनीगु खः। पुरुषोत्तम अनला चतुर्मासय् च्वंगु व च्वनीगु दँ थथे दु:
गुंला
२०२३ साउन
२०४२ साउन
२०६१ साउन
यंला
२०३१ भाद्र
२०५० भाद्र
२०६९ भाद्र
कौला
२०२० असोज
२०३९ असोज
२०५८ असोज

आः झिंनिलाया नीप्यंगू एकादशीया धलः थथे दु -
१) गुंलाथ्व पुत्रदा, २) यंलाथ्व परिवर्तिनी, ३) कौलाथ्व पापांकुशा, ४) कछलाथ्व हरिबोधनी, ५) थिंलाथ्व मोसदा, ६) पोहेलाथ्व पुत्रदा, ७) सिल्लाथ्व भिमा, ८) चिल्लाथ्व अमलिका, ९) चौलाथ्व कामदा, १०) बछलाथ्व मोहिनी, ११) तछलाथ्व निर्जला, १२) दिल्लाथ्व हरिशयनी, १३) अनलाथ्व पद्मिनी, १४) गुंलागा जया, १५) यंलागा इन्दिरा, १६) कौलागा रमा, १७) कछलागा उत्पन्तिका, १८) थिंलागा सफला, १९) पोहेलागा षडतिला, २०) सिल्लागा बिजया, २१) चिल्लागा पापमोचनी, २२) चौलागा बरुयिनी, २३) बछलागा अपरा, २४) तछलागा योगिनी, २५) दिलागा कामिका, २६) अनलागा परमा ।

थुगुसी अनला क्यंगुलिं निगू एकादशी अप्वः जूगु खः।
अले स्मातीनाम एकादशी व बैष्णवानाम एकादशी निगू एकादशी लछि लछिया एकादशी मदु। 'लाग्दो तिथि' व 'छोड्दो तिथि' धाये थें निन्हु क्यनीगु कथंया खः। गथे आमाई नये जिउगु व नये मजिउगु स्मातीनाम व वैष्णवानाम खः। अथे हे पितृकार्य स्मार्तानाम देवकार्य बैष्णवानामकार्य। थज्याःबलय् एकादशी कि निन्हु क्यनाच्वनी कि त नवमी कुन्हु दशमी टुट जुयाः कन्हय् कुन्हुया एकादशी पुरा जूसां स्मातीनाम वा द्वादशी सुथबःछिया बैष्णबानाम जुयाच्वनी ।

अथे हे एकादशी हे टुट जुयाः दशमी कुन्हु एकादशी क्यंसा स्मार्तानाम् व द्वादशी कुन्हु सुथय् भचा क्यंगु कथं बैष्णवानाम धाइ ।

आः थौंया न्हि कुन्हु नेपाःया सतीगु पशुपतिइ भक्तजनपिं हुलहुल जुयाच्वनी। चतुर्मासया एकादशी कुन्हु न्ह्याबलें ब्रत च्वनाच्वनी। अथे हे गुलिं न्हिंन्हिं, गुलिं पुन्हि पतिकं, गुलिं बार कथं थीथी तिथि अनुसार चतुर्मास दुने व्रत च्वनेगु याइ ।

थौंया थ्व एकादशी धइगु तःधंगु एकादशीया न्हि जुयाः सत्यनारायणया धलं दनाः सत्य नारायण पुजा यायेगु नं याइ। थौं हे थीथी पुराण ग्रन्थया बाखं चुक, लाछि, ननिइ कनेगु नं याइ। थ्व चतुर्मासया प्यला दुने गुरुपुन्हि निसें गथांमुगः, नागपञ्चमि, ऋषि तर्पणी, कृष्णाष्टमी, पञ्चदान, यंयाः पुन्हि, मोहनि, स्वन्ति थेंज्याःगु नखःचखःत लाः वइ ।

More Stories Like this