तालाबन्दी ताः लाकेत सहलह मुँज्याः

येँ महानगरपालिकाय् असमावेशीय तरिकां न्हूपिं कर्मचारीत भर्ना याःगु विरुद्ध बुधवाः येँया दक्वं वडाय् यायेत्यंगु तालाबन्दीया बारे नेवाः स्वायत्त राज्य मंकाः संघर्ष समितिं मंगलवाः छगू सहलह मुज्याःगु याःगु दु । समितिं कन्हय् येँया ३५गूलिं वडाय् यायेत्यंगु तालाबन्दीया बारे ३५गूलिं वडाया पुलांपिं वडा अध्यक्ष, दुजः व स्थानीय प्रतिनिधित नाप सहलह याःगु दु ।

संघर्ष समितिया नायः मंगल महर्जनया सभापतित्वय् क्षेत्रपाटी पार्टी प्यालेसय् न्ह्याःगु मुँज्याःय् ३५गू वडाय् तालं ग्व वनिपिं प्रतिनिधितय् नां धलः तयार याःगु खः । उगु ज्याझ्वलय् प्रत्येक वडाया प्रतिनिधियात संघर्ष समितिं ताः, जानकारी पत्र व नेवाः स्वयात्त राज्यया ध्वाँय् लःल्हाःगु खः । कन्हय् प्रत्येक वडाय् तालं ग्वे धुंकाः अन जानकारी पत्र तिकीगु व नेवाः ध्वाँय् नं ब्वयेकीगु ग्वसाः दु । संघर्ष समितिं थःपिनिगु माग पूमवंतल्ले येँया दक्वं वडाय् तालाबन्दीया ज्यायात निरन्तरता बीगु जानकारी ब्यूगु दु ।

ज्याझ्वय् नेवाः राष्ट्रिय मुक्ति मोर्चा येँया नायः उमेश स्थापितं लसकुस न्वचु बियादीगु खःसा संघर्ष समितिया सचिवालय कजि मल्ल के सुन्दरं कन्हय्या तालाबन्दीया बारे जानकारी बियादीगु खः । माओवादी सभासद् दिलिप महर्जन व येँ महानगरपालिका नेवाः ज्याकमि गुठीया नायः नरेन्द्र श्रेष्ठं नं थःगु नुगः खँ प्वंकादीगु ज्याझवलय् नेवाः ल्याम्ह पुचःया कजि नरेशवीर शाक्यं सुभाय् बियादीगु खः ।

More Stories Like this