बहुमतया लुखां दुहांवनाः सहमतीय सरकार दयेकीगु
माओवादी व एमालेया निर्णय मधेशवादीं पियाच्वन
येँ (सन्ध्या टाइम्स)/नेकपा (एमालें) आःया अवस्थाय् बहुमतीय सरकारया लुखां दुहां वनाः सहमतीय सरकार दयेकेगु रणनीति दयेकीगु जूगु दु ।
उकिया निंतिं एमालेया थौं सुथंनिसें स्थायी समितिया बैठक च्वनाच्वंगु दुसा थौं हे केन्द्रीय कमिटीया नं बैठक च्वनाः भावी प्रधानमन्त्रीया उम्मेदवार बारे निर्णय याइगु खँ धाःगु दु। थःपिनि नेतृत्वय् सरकार दयेकेफत धाःसा कन्हय् वनाः नेपाली कांग्रेसयात नं दुत हये फइगु सम्भावना दुगुलिं आःयात बहुमतया लुखां दुहांवनाः कन्हय् राष्ट्रिय सहमति ब्वलंकेगु रणनीति दयेकूगु खँ एमालेया छम्ह नेतां 'सन्ध्या टाइम्स' यात कनादिल ।
नेकपा (एकीकृत)या महासचिव रामसिंह श्रीषं थौं सुथय् एमाले अध्यक्ष झलनाथ खनाललिसे खँल्हाःगु इलय् खनालं संविधान दयेकेत दुई तिहाई बहुमत माःगु जुयाः दुई तिहाई बहुमत जुइगु जुल धाःसा थः प्रधानमन्त्रीया उम्मेदवार जुइ धकाः कनादीगु खँ सीदुगु दु ।
भाजु श्रीषं थौं 'सन्ध्या टाइम्स' लिसे खँ ल्हासें थ्व जानकारी बियादीगु खः। उगु इलय् थम्हं वामपन्थीतय्गु बहुमत दुगुलिं वाम पार्टीया गठबन्धनं सरकार दयेकेमाः धकाः बः बियागु खँ नं कनादिल ।
थ्वहे झ्वलय् माओवादीं नं थःपिनि नेतृत्वय् सरकार दयेकेगु निंतिं थौं सुथंनिसें मधेशवादी दलया नेतातलिसे सहलह ब्याकाच्वंगु दु ।
माओवादीं आःया अवस्थाय् एमाले गुकथं वनी धकाः पियाच्वंगु दु। एमालेया निर्णय वयेधुंकाः जक पोलिटब्यूरो बैठक च्वनाः मेगु निर्णय यायेगु धकाः माओवादी बल्खुपाखे स्वयाच्वंगु खँ धाःगु दु। माओवादीं यदि थःपिंसं सरकार दयेके मफुत धाःसा एमालेयात समर्थन यायेगु धकाः म्हिगः याःगु अनौपचारिक सहमतिं एमाले दुने हलचल हया बिउगु दु ।
थ्व अवस्थाय् आः एमाले व माओवादीं छु निर्णय याइ धकाः मधेशवादी दलत पियाच्वंगु खँ सीदुगु दु। एमाले व माओवादीया निर्णय गज्याःगु वइ धकाः मेखे नेकपा (संयुक्त), राष्ट्रिय जनमोर्चा नेपाल व नेकपा (माले) नं पियाच्वंगु खँ संयुक्तया नेता सुनिल मानन्धरं कनादीगु दु। नेपाल मजुदुर किसान पार्टीं धाःसा आःया अवस्थाय् सु उम्मेदवार जुइ अले गुज्वःगु ज्याझ्वः हइ वहे आधारय् जक समर्थन वा विरोध यायेगु जुइ धकाः माओवादी व एमालेयात धयाछ्वये धुंकूगु दु ।
निगू पार्टीं मनोनयन पत्र यंकल
येँ(सन्ध्या टाइम्स)/ प्रधानमन्त्री उम्मेदवारया निंतिं मनोनयन पत्र इनेगु शुरु जूगु दु। थ्व मनोनयन पत्र दकलय् न्हापां हे नेपाली कांग्रेसं यंकूगु दु। थौं न्हिनय् तक चीधंगु झिंन्यागू दलपाखें चुरेभावरया नेता केशव मैनालीं नं मनोनयन पत्र यंकूगु दु। अथे हे थौं माओवादी, एमाले व मधेशवादी दलतय्सं नं मनोनयन पत्र यंकीगु सम्भावना दु। कन्हय् न्हूम्ह प्रम ल्यइगु चुनाव जूगुलिं कन्हय् हाकनं लिकाये माःसां थौं म्होतिं नं प्यंगू दलं मनोनयन दर्ता याइगु सम्भावना ब्वलंगु दु ।
