"पटाचारा"या अनित्य दर्शन

देव रंजित

"पटाचारा" संकिपाया प्रदर्शनीपाखें बुद्धया अनुयायीपिंत बुद्धया छम्ह श्राविकाया जीवनी अवलोकन यायेगु मौका चूलाःगु दु। थ्व हर्षया खँ खः ।

तर थुगु संकिपाया आपालं खँत मौलिक ग्रन्थनापं ज्वःलाःसां छुं छुं खँ तापानाच्वंगु खँ नं दुगु थें ताल। बुद्धकालिन ऐतिहासिक बाखं छुं नं लोकंह्वाःगु घटनात संकिपा मार्फत प्रदर्शन यायेबलय् उकिया मर्मया नापं उगु घटनाय् दुथ्यानाच्वंगु खँयात दुग्यंक उलाः क्यनेमाः धयागु अभिप्राय खः। जिगु थ्व हे बिचाः थन न्ह्यब्वयाच्वना।
उगु संकिपा स्वयाबलय् श्रावस्ति नगरय् जूगु घटनाया बाखंया उद्घोष ताये दत। तर श्रावस्ति नगरय् ताइगु लु खने मदु। "पटाचारा"यात छाय् "पटाचारा" धाल धइगु लु तक ला न्यनातःगु बाखं थें सललं न्ह्याःगु खनेदत। तर न्हापां ला "पटाचारा"या दक्व जःया विछोड व्यथां वेहोस जुयाः उखेंथुखें जुयाः च्वंबलय् उइं १ हय् उइं १ धकाः मस्तसें लितुलिउ जूबलय् छु जूगु धयागु विवरण जुवाःद्यःया म्हुतुं कंकः तःगु मिले मजू थें ताल, स्वाभाविक खने मंत। पाली ग्रन्थय् कनातःथें मजूगु ताल ।

थेरी गाथा कथं "पटाचारा" थः मिजं, निम्हं काय्पिं अले थःमांबौ व किजा सकलें सिना वनाः विछोडय् बिरह बेदनां बेहोस जुयाः उखेंथुखें हालाजूबलय् जेतवन विहारया न्ह्यने थ्यंकःवल। वहे ईलय् जेतवन विहारय् भगवान बुद्ध च्वंगु जुयाच्वन। धर्मदेशना न्यनाच्वंपिंसं धाल थ्व ला उईं खः। थ्वइत थन दुकाये मते। भगवान बुद्धं धयाबिज्यात थ्वइत पने मते। जिथाय् वयेके बिउ। भगवानया भच्चा तापाक्क न्ह्यने थ्यंबलय् भगवानं धयाबिज्यात " केहें मय्जु १ चेतना तंके मते, होसय् लिहां वा।" भगवान बुद्धया करुणा भावं विलिविलि जाःगु शब्द "पटाचारा" न्ह्यलं चाःथें होसय् वल। बुद्धया श्रीमुखं केंहें धयागु सम्बोधनं हाःनाः मदु धकाः जुयाच्वंम्ह "पटाचारा"यात होसे हयाबिल। थुगु महत्वपूर्ण केहें शब्द बुद्धया श्रीमुखं संकिपाय् उच्चारण याकामतगु तसकं मगामचा थें ताल। अले थः पचिनांगा जुयाच्वंगु खनेवं लज्याभावं मछाला भ्वसुल। छम्ह मनूनं वयाः म्हय् गा छपु तयाबिल। मछिंमछिं गातुं भुना भगवान बुद्धयात न्याक्वः तक चाःहुला ह्वाँय् ह्वाँय् ख्वल। थःगु बेदना थुइकेगु झ्वलय् "पटाचारां" कनाः यंकल। लँय् अक्षीरवति खुसि छिना च्वनाबलय् छम्ह काय्यात इमां दायायन। मेम्ह काय्यात खुसिं च्वीकायन। जि मिजं नं लँय् तुं सर्पं न्यानाः सित। थःछँ मां, बौ व किजानं भुखाचं ल्हानाः सित धकाः थःगु जीवनया बाखं "पटाचारा"या म्हुतुं हे शास्तायात कंगु खँ फ्ल्यास बाय्कय् कंगु जूसा "पटाचारा" बाखं स्वभाविक कथं सलल न्ह्यागु खनेदइगु जुइ ।

वैगु खँ न्यनाः भगवान बुद्धं धयाः बिज्यात "केंहें मय्जु, "पटाचारा" छं छुं हे पीर काये मते। छ थज्याःम्ह मनूया थाय् थ्यने धुंकल सुनां छन्त रक्षा याय्फु।" भगवान शास्तानं धयाबिज्यात "पटाचारा" १ छं थः काय्पिं, थः जः सकलें सिनावंगुलिं छं गुलि ख्वबि हायेकूगु खः उकथं हे थ्व अनादि संसारय् छं हायेकूगु ख्वबि मुंकातःसा प्यंगू महासमुंद्रया लःस्वयानं अप्वः जुइधुंकल जुइ "पटाचारा" मचाखाचा परिवार जः सुनानं हे छन्त शरण कयाः उद्धार याये फइमखु। छं थःगु जीवनय् शीलपालन यानाः शील शोधन याः। थुकिं हे जक अरहन्त पद लानाः कयाः निर्वाण कामनाया लँपुइ न्ह्यावने फइ। थन नं कायम्ह्याय्पिंसं रक्षा याइ, न मांबौंपिंसं हे, थःथिति स्याःन्याःपिसं छन्त रक्षा याय्फइ। मृत्युं काःवय् धुंकल धाय्वं सुं हे थःथिति इष्टमित्रपाखें रक्षा याये फइमखु। भगवान शास्ताया उपदेश न्यनाः "पटाचारा" या नुगः मछिंसे भचा क्वलात। अले भगवानयात बिन्ति यानाः धाल जितः प्रवज्या यानाबिज्याहुँ। शास्तां "पटाचारा"यात भिक्षुणीतय्थाय् यंकाः प्रवजित याकाबिज्यात ।

भिक्षुणी जुइधुंकाः
प्रवज्या कायेधुंकाः निरन्तर धर्मदेशना न्यनाः, चिन्तन मनन् यानाः "पटाचारा"या जीवनय् दुःख तनावन। धर्मया लँपुइ न्ह्यां वनेत मदिक्क कुतःयाना वन। भिक्षुणीत मध्ये व विनय पालनया लँपुइ दक्व स्वया च्वय्थ्यंम्ह जुयाः जीवन हनाच्वन। विनय पालना यायां "एतत्दग्ग" धैगु पद नं प्राप्त जुल ।

छन्हू घः छगलय् लः जायेक तयाः तुति सिलाच्वन। "पटाचारां" खन, न्हापालाक्क प्वंकूगु लः छुं भच्चा न्ह्यने बाःवनाः बँय् सुनावन। निक्वः खुसि प्वंकूगु लः नं न्हापा स्वयां भच्चा तापाक्क बाः वनाः सुनावन। स्वक्वः खुसी दक्व लः प्वंकाः तुति सिले सिधयेकूबलय् बाःवंगु लः अझ् भच्चा न्ह्यःने वनाः बँय्तुं सुनावन। लः बाःवंगु स्वस्वं हे वं समाधिया आलम्बन लुइकल। वं बिचाः यात "न्हापालाक प्वंकागु लःथें तुं छुं छुं प्राणीत जीवनया बैस मत्यवं हे कम उमेरय् सिनावनी, निक्वः खुसि प्वंकागु लःथें तुं छुं छुं प्राणीपिं मध्ये बैसय् हे सिनावनी, लिपा स्वक्वः खुसि प्वंकागु लःथें तुं छु छु प्राणीपिं अन्तिम बंैसय् थ्यंका सिनावनी। संसार दक्व अनित्य अनित्य धकाः थुइकी। सर्वज्ञ बुद्ध वयाः न्ह्यःने दनाः धयाच्वं थें ताल, "पटाचारा" १ संसारय् दक्व मरण धर्म खः।" थुकथं "पटाचारां" बोधिज्ञान लानाः कयाः बुद्ध शासनया विनयलय् "एतत्दग्ग: पद प्राप्त यानाः भिक्षुणी संघयात बल्लाका जीवन न्ह्याकाच्वंगु लु नं संकिपाय् कःघाये फुगु जूसा दर्शकतय् मनय् बुद्धया उपदेशप्रति अझ मनूत आकर्षण जुजुं वनीगु जुइ ।

More Stories Like this