"ॐ" खँग्वः व छ्यलाबुला

उत्तमराज शिलाकार

ॐ खँग्वः अप्वः थें मन्त्रोचारण व देवीदेवतापिनिगु सिलः (स्तोत्र) य् छ्यला वयाच्वंगु खः। हिन्दू धर्म जुइमा बौद्ध धर्म जुइमा थुकिया छ्यलाबुला न्यंकनं खनेदु। हिन्दू धर्मय् शिवसत्वयात कयाः छ्यलाच्वंगु थुगु खँग्वः बौद्ध धर्मया सिलः वज्रयान व महायान दुनेया स्तोत्र तन्त्र मन्त्र पूजा पाठ्य द्यःदेवीपिंत हनावना तयेत छ्यलातःगु खनेदु।

शाव्दिक अर्थ:
अप्वः थें धर्मया प्रतिक कथं छ्यला वयाच्वंगु थुगु खँग्वःया अर्थ शुभ, कल्याण, मंगल, सत्य अले इश्वरीय गुह्य रुप खः। भिं यायेगु व भिं जुइकेगु ज्याय् दकलय् न्ह्यःने च्वनाः उच्चारण जुयाच्वनीगु थुगु मंगल खँग्वलं विश्व ब्रम्हाण्डयात कय्च्यानाच्वंगु दु। ॐ खँग्वः हे जक अज्याःगु खँग्वः खः गुकिं हिन्दू, बौद्ध, जैन, वैष्णवी व शिख धर्मयात समेत कःघाः ।

च्वयेबलय् ॐ धकाः च्वइगु थुगु खँग्वः धाथें ला (अंउंम) स्वंगः आखःया संयुक्त रुप खः। पुलांपुलांगु नेवाः भाय्या पाठ यायेगु सफुली ॐ खँग्वःयात 'ओं' धकाः छ्यलातःगु लुइनेफु। अथेहे खँय् भाय्या थीथी ग्रन्थय् नं 'ओम' वा 'ओं' धकाः छ्यलातःगु खनेदु। थथे च्वयेबलय् थुगु आखःया शाव्दिक अर्थ शुद्ध मजुइफु। उकिं पाय्छिगु खँग्वः छय्लेगु स्वयेमाः ।

मंगल चिं कथं छय्ला:
वास्तुकला शास्त्रया आधारय् विद्वानपिनि मतकथं छेँय् छुं मंगल चिं तया तयेगु भिं। थथे मंगल चिं नालातःगु थीथी वस्तु मध्ये स्वस्तिक, पलेस्वां, ज्वः न्या, पूर्ण कलश, गणेश�कुमारया मूर्ति खः। छेँयात मंगल शान्ति याना तयेत छगः आखः "ॐ" यात अष्टधातुयागु दयेकाः पूर्वपाखे स्वकाः मू लुखा च्वय् तयातल धाःसा छेँयात मंगलमय याना तइ। थुकिं छेँ, छेँय् च्वनीपिं व छेँय् वइपिं मनू� तय्के धर्मया आस्था, सद्धर्म प्रति जागरुकता व सहिष्णुता ब्वलंका बी। गुकिं छेँय् सुख, शान्ति व उन्नतिया लँपु दयेकेत ग्वाहालि यानाच्वनी ।

धार्मिक विश्वास:
हिन्दू धर्मय् ॐ यात अति हे पवित्र खँग्वः कथं कयातःगु दु। ॐ खँग्वःयात ब्रम्ह रुप बियातःगु दु। सृष्टिया उद्गम शिव स्वरुप व मंगलया चिं कथं श्री मंगलकारी गणेशया प्रतिक नापं महाकाली, महालक्ष्मी व महासरस्वतीया प्रतीकया रुपय् नं कयातःगु दु। वैदिक मतकथं सुयाके ॐ खँग्वःया आत्मीय ज्ञान दइ मखु वं मोक्ष प्राप्त याये फइ मखु। छाय्कि ॐ हे अज्याःगु खँग्वः खः गुकिं आत्मीय शान्तिया लँपु क्यनाच्वंगु दइ ।

ॐ खँग्वः धर्मप्रति आदरभाव तयेगु खँग्वः खः। न्हापांनिसें धार्मिक साधना याइपिंसं (ऋषि, मुनि, साधु, सन्त) थ्व खँग्वःयात मू मन्त्र भाःपिसें साधना यानाः मोक्ष प्राप्त यानाच्वंगु दु ।

शान्ति व आरोग्यया प्रतिक:
ॐ खँग्वःया शाव्दिक ज्ञान थूपिंसं ॐ खँग्वःया शुद्ध उच्चारण यासें दैवीशक्ति प्राप्त यानाच्वनी। दैवीय शक्ति कयाः आरोग्य लाभ कासें निरोगी जुयाच्वनेगु ज्याय् नं ॐ खँग्वःयात छ्यलाच्वंगु दु। सुथ न्हापां चकंगु थासय् च्वनाः गुलि फत उलि ताःहाकः सासः ल्हासें कथुंनिसें न्हासय् तक थ्वक्क ॐ खँग्वः उच्चारण यानाच्वन धाःसा थुकिं म्हय् च्वंगु विका फुक्कं मदया वनी। ॐ खँग्वः मनय् तयाः ध्यान यायेबलय तःधंगु शान्ति प्राप्त जुइ। थुकियात हे छ्यलाः श्वासप्रश्वास क्रियाया माध्यमं निंगु फय् स्वँय् दुछ्वयाः स्वास्थ्य लाभ याये फइ ।

ॐ खँग्वःया विशेषता:
ॐ खँग्वःया स्मरणं स्मरण शक्ति बल्लाकाः बिचाः यायेगु शक्ति, खः मखु थुइकेगु विवेक शक्ति अप्वया वइ। ॐ या उच्चारण मात्रं हे फुक्क अमंगल नाश जुइ। ॐ खँग्वःया हुँकारं अमानुष तत्व (भूत, प्रेत, पिशाच) नाश जुया वनी। ॐ कारया उच्चारणं नुगः व न्ह्यपुइ एकाग्रता हया बी। ॐ खँग्वः न्ववायेलबय् पालींनिसें छुं अदृश्य तत्व थहां वयाः नुगःयात थियाः कथुं च्वय् थहां वनाः चसुप्वालय् तक थ्यनी। थुकिं झीत अभूतपूर्व शक्ति प्राप्त जुसें मन मष्तिष्कय् आनन्दया लहर हया बी। हिन्दू, बौद्ध व मेगु आर्य धर्मयात समन्वय यानाच्वंगु खँग्वः दुसा व ॐ हे जक खः ।

थीथी धर्मय् ॐ या छ्यलाबुला:
ॐ खँग्वःयात थीथी धर्मकथं थःथःगु हे मान्यता व अर्थ छ्यला वयाच्वंगु दु। हिन्दू धर्मावलम्बीतय्सं ॐ खँग्वःयात सत्य, शिव व सुन्दर खँग्वःया रुपय् ब्रम्हा, विष्णु व शिव अथे धइगु सृष्टि, पालनकर्ता व मोक्षया रुपय् छ्यली। जैनतय्सं महावीर वर्धमान खः धाइ। हिन्दू वैदिक धर्म हनीपिंसं शिव, शक्ति, गणेश, विष्णु व शाक्तिया प्रतिक कथं कयाच्वन। अथेहे बौद्ध धर्म हनीपिसं वागीश्वर (महामञ्जुश्री) बोधिसत्व, आर्यावलोकितेश्वर व पञ्च बुद्धपिंत स्तुति यायेबलय् व आर्यतारा, बसुन्धरा प्रतिसरादेवी आदि शक्तिया देवीपिंत स्तुति यायेबलय् न्ह्यःने वइगु आखःग्वः कथं छ्यला वयाच्वंगु दु। बौद्ध धर्मया विशेषकथं वज्रयान व महायानय् थुकिया छ्यलाबुला जुयाच्वंगु दु। कट्टर हिन्दूतय्सं ला ॐ खँग्वःयात हिन्दू धर्मया हे आर्य खँग्वः कथं दावी यानाच्वंगु दु। अले थ्व खँग्वः छ्यलीपिं फुक्क हे हिन्दू धर्मया चाकः दुने तयेगु नं यानाच्वंगु दु। उकिं उमिसं बुद्धयात नं विष्णुया गुंगूगु अवतार कथं ल्वाकछ्यायेगु ज्या यानाच्वंगु दु ।

थुकियात बौद्ध जगतं माने यानाच्वंगु मदु। थेरवादी बुद्ध धर्म हनीपिंसं आत्मा व परमात्मायात माने याइ मखु। अथे खःसां बुद्ध धर्मया हे छगू कचा महायानीतय्सं धाःसा बुद्धया अवतारयात विश्वास यासें दलाइ लामा, कर्मापा, पञ्चेन लामायात विश्वास याः। अले ॐ खँग्वःयात नं हनाः "ॐ मने पद्मे हुँ" कथं कायेफु। अथेहे वज्रयानी धर्म हनीपिं बौद्ध मतयापिंसं नं ॐ यात यक्व हे प्राथमिकता बियातःगु खंकेफु ।

हिन्दू धर्मया देवीदेवतापिनि स्वस्तिवाक्य स्तुति, मन्त्र पूजा आदिइ खने दयाच्वनीगु ॐ खँग्वः बौद्ध धर्मय् थीथी देवदेवीपिनिगु बन्दना नापं धारणा, स्तोत्र, सिलः, मन्त्र आदिइ छ्यलातःगु दु ।

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया