एमालें झलनाथ हे ल्यइगु
थौं सुथन्हापां हे सुद व नेकां नेतात वालुवाटारय् बैठक
येँ (सन्ध्या टाइम्स)/नेकपा (एमालें) दुई तिहाई बहुमतया सरकार दयेकेगु धइगु म्याण्डेट सहित पार्टीया अध्यक्ष झलनाथ खनालयात प्रधानमन्त्रीया उम्मेदवार दयेकीगु सम्भावना अप्वया वःगु दु। थौं च्वनीगु केन्द्रीय कमिटीया बैठकय् थ्व निर्णय जुइफुगु खँ धाःगु दु ।
तर झलनाथ खनाल प्रधानमन्त्री जुल धाःसा पार्टीया जिम्मेवारी सुनां कायेगु धइगु खँय् धाःसा एमाले दुने विवाद पिहां वःगु दु। सूत्रया कथं खनाल प्रधानमन्त्री जुल धाःसा कार्यवाहक अध्यक्षया जिम्मा थःपिंत माः धकाः केपी ओलीं दावी यानाच्वंगु दु। तर खनालं कार्यवाहक अध्यक्ष छगू बाहेक मेगु न्ह्यागु जिम्मेवारी फ्वंसां बीत थः तयार दु धकाः धाःगु खँ सीदुगु दु ।
उखे थौं केन्द्रीय कमिटीया बैठक च्वने न्ह्यः वालुवाटारय् प्रधानमन्त्री माधव नेपाल, पार्टी अध्यक्ष झलनाथ खनाल व नेता केपी ओली दथुइ बिस्कं बैठक च्वंगु दु। पार्टी सरकारय् वन धाःसा प्रधानमन्त्री सु जुइगु धइगु खँय् कचवं पिहां वयाः खनाल व ओली दथुइ फोनय् खँ ल्हायेगु तकं बन्द जुइधुंकूगु खँ सूत्रं धाःगु दु। उकिं थौं माधव नेपालया मध्यस्थताय् वय्कःपिं समेत च्वनाः खँल्हाबल्हा जूगु खः। यदि थौं सुथय् च्वंगु वय्कःपिनि वार्ता ताःलात धाःसा केन्द्रीय कमिटीं याउँक निर्णय याये फइगु खँ नं सुत्रं धाःगु दु ।
एमालें दुई तिहाई बहुमतया सरकार दयेकेगु खःसा उकी माओवादीया समर्थन मदयेकं मगाः। प्रमुख रुपं माओवादीं समर्थन यायेगु व मेगु मधेशवादी दलतय्सं समर्थन यात धाःसा दुई तिहाई बहुमतया सरकार बने जुइ। सरकार दुई तिहाई जुल धाःसा संविधान दयेकेत नं अःपुइगु दावी एमालेया दु। छाय्धाःसां संविधानया बुँदात पारित यायेत दुई तिहाई हे माः ।
उखे एमाले व माओवादीया सरकार गठन जुइ फइगु सम्भावना खने दया वःगुलिं थौं सुथ न्हापां हे भारतीय राजदूत राकेश सुद वालुवाटार वनाः प्रधानमन्त्री माधव नेपालयात नापलानादीगु दु। वय्कलं सुथय् ७.४५ निसें ८.१५ बजे तक प्रम नेपाललिसे खँल्हाबल्हा यानादीगु खः ।
वय्कः दुहां वंगुयां छुं ई लिपा हे कांग्रेसया महामन्त्री विमलेन्द्र निधि व पुलांम्ह गृहमन्त्री कृष्णप्रसाद सिटौला नं वालुवाटार दुहां वंगु खः। दुने वय्कःपिनि दथुइ मंकाः रुपं सहलह जूगु खँ धाःगु दु ।
