रामचन्द्र पौडेल भिंम्ह प्रम जुइ ला?

भावी प्रधानमन्त्री सु जुइ धइगु खँय् फुक्क हे पार्टी दुने विवाद जुयाच्वंगु इलय् नेपाली कांग्रेसं थःगुपाखें प्रधानमन्त्री जुइम्ह मनू निश्चित याःगु दु। कांग्रेसं भावी प्रधानमन्त्रीया नेतृत्व याइम्ह मनूया रुपय् थःपिनि संसदीय दलया नेता रामचन्द्र पौडेलया नां पारित याःगु दु। अजूचायापुगु खँ ला छु धायेबलय् कांग्रेस दुने प्रधानमन्त्री जुइत दावी याना वयाच्वंपिं शेरबहादुर देउवा व कुल बहादुर गुरुंगपिं हे प्रस्तावक व समर्थक जुयादीगु दु ।

एमाले व माओवादीं प्रधानमन्त्रीया उम्मेदरवर क्वःछी मफयाच्वंगु इलय् कांग्रेसं उम्मेदवार क्वःछिउगु धाथें नं लसताया खँ खः। तर थौं नेपाः गुगु अवस्थां न्ह्याः वनाच्वंगु दु, उकिया सन्दर्भय् धायेगु खःसा रामचन्द्र पौडेल वर्तमान नेपाःयात ल्वःम्ह प्रधानमन्त्री जुइ फइ ला? छाय्धाःसां थौं नेपालय् जनआन्दोलनया उपलब्धी कथं गुगु प्राप्तीत चूलाःगु खः, वय्कः उकिया विरोधी खः। वय्कलं धर्म निरपेक्षता व संघीय व्यवस्थायात पूर्ण रुपं हे विरोध यानादीगु दु। थ्व मामिलाय् वय्कःया बिचाः सुं सामन्तवादी जुजुवादीया बिचाः स्वयां फरक मजू। थौं नेपाः संघीय प्रणाली सहित धर्म निरपेक्ष लोकतान्त्रिक गणतान्त्रिक संविधान दयेकेगु लँपुइ न्ह्याः वनाच्वंगु दु। तर थज्याःगु इलय् देय्या प्रधानमन्त्री जुइम्ह मनू धाःसा थ्व उपलब्धीया हे विरोधी लानाच्वन। छु थज्याःम्ह प्रधानमन्त्रीं अज्याःगु संविधान दयेकेगु ज्याय् छुं कथं ग्वाहालि याइ ला? अथवा संविधान उकथं बने जुइगु लँपुइ वन धाःसा उकियात असफल यायेत जकं पलाः मल्ह्वनी ला? थौं थ्व इलय् रामचन्द्र पौडेलया बारे थज्याःगु बिचाः मयासें मगाः ।

More Stories Like this