येँ मनपाय् नेवाःतय् धर्ना
'मनपां नेवाः स्वायत्त राज्यया अवधारणा नालेमाः'
येँ (सन्ध्या टाइम्स)/नेवाः स्वायत्त राज्य मंकाः संघर्ष समितिं नेवाः स्वायत्त राज्य कथं ज्या यायेमाःगु माग यासें थौं येँ मनपाय् हस्तक्षेप यासें धर्ना बिल ।
मंकाः संघर्ष समितिया नेतृत्व नापं नेवाः आन्दोलनया सलंसः कार्यकर्तातय्सं मनपाया केन्द्रीय ज्याकू बागदरवारय् नाराबाजी यासें सुथय् १० निसें १२ बजे तक उगु धर्ना बिउगु खः। धर्नाय् नेवाः न्ह्यलुवातय्सं संवोधन नं यानादीगु खः। मनपाय् कर्मचारी भर्नाया निंतिं पिकाःगु अन्तर्वार्ता धलः रद्द यायेमाःगु, मनपाय् नेवाः स्वायत्त राज्यया अवधारणा कथं ज्या यायेमाःगु नापं थीथी माग यानाः मंकाः संघर्ष समितिं दबाबमुलक ज्याझ्वः याःगु खः। थ्व झ्वलय् वइगु ५ गते मनपाया फुक्कं ज्याकुथी तालं ग्वयेगु, ७ गते पदपूर्तिया ज्याकुथी तालं ग्वयेगु व ९ गते मनपाया मू ज्याकुथी हे तालं ग्वयेगु ज्याझ्वः दयेकातःगु दु ।
नेवाः डेस्क शुरु
नेवाः स्वायत्त राज्य मंकाः परिषद् किपूपाखें थनिंनिसें किपू नगरपालिकाय् नेवाः हेल्पीङ डेस्क संचालन यात। किपू नपाया हे स्वम्ह नेवाः कर्मचारीयात नेपालभाषा, नेवाः स्वायत्त राज्यया अवधारणा नापं थीथी पक्षयात कयाः प्रशिक्षण बियाः थ्व नेवाः डेस्क संचालन याःगु खः। अथे हे किपू नगरपालिकाया म्हिगः क्वचाःगु नगरपरिषदं नेवाः स्वायत्त राज्य मंकाः परिषद्या निंतिं अनुदान स्वरुप निगू लाख तका ध्यबा बीगु निर्णय नं याःगु दु ।
