भ्रष्ट न्यायाधीशयात कारवाहीया पलाः

वास्तवय् नेपाःया न्याय प्रणाली नं भ्रष्टाचारं मुक्त मजू धइगु खँ न्याय परिषदं आः नकतिनि याःगु छगू निर्णयं बांलाक हे क्यना बिउगु दु। डा. भक्तमान श्रेष्ठयात अपहरण याःपिं अपराधीतय्त निदँ न्ह्यः घूस नयाः त्वःतूगु द्वपनय् तत्कालिन जिल्ला अदालतया न्यायाधीश तेजबहादुर कार्कीयात न्याय परिषद् निलम्बन याना बिउगु दु। थौंकन्हय् हेटौंडा पुनरावेदन अदालतया न्यायाधीश जुयाच्वंम्ह कार्कीयात निदँ न्ह्यः स्वम्ह अपराधीयात सामान्य दां जक बं कयाः त्वःताछ्वःगु द्वपनय् ज्वंगु खः। अबलय् उम्ह न्यायाधीशं त्वःताछ्वःपिं अपराधीतय्सं हे आः वयाः डा. भक्तमान श्रेष्ठयात अपहरण याःगु जुयाच्वन। थुकथं ध्यबा घूस नयाः अपराधीयात मुक्त यासें समाजयात अझ अपराधपाखे घ्वायेगु ज्याय् तिबः बिउपिं न्यायाधीशतय्त न्यायया हे छगू निकायं याःगु थ्व दण्डं नेपाःया न्याय प्रणाली दुने नं भ्रष्टाचार दु धइगु बांमलाःगु किपा क्यना बिउगु दुसा अज्याःपिं भ्रष्ट न्यायाधीशतय्त कारवाही यायेगु ज्या न्ह्याकाः आः न्याय क्षेत्रयात शुद्ध यायेगु अभियान शुरु जुल धइगु छगू उत्साहपूर्ण सन्देश नं पित बिउगु दु ।

लिपांगु छुं ई न्ह्यवंनिसें नेपाःया अदालत भ्रष्टाचारया मेगु छगू तःधंगु दलदल जुयाच्वन धइगु खँ तसकं चर्चाय् वयाच्वंगु खः। वास्तवय् न्यायालय व न्याय प्रणालीयात बदनाम याइपिं तेज बहादुर कार्की थेंज्याःपिं भ्रष्ट न्यायाधीशत खः। थज्याःपिं मेपिं नं न्याम्ह खुम्ह ति भष्ट न्यायाशीतय्त कारवाही याये फत धाःसा मेपिं भ्रष्टत भ्रष्टाचार यायेत हे ग्याइ। लिसें न्यायालय प्रतिया विश्वास व आस्थायात नं कायम हे याना तये फइ ।

More Stories Like this