झीगु छेँ झीगु शहर

झरना शाक्य

खय्त ला दक्व मनूतय् चाहना दइ, थःगु नं छखा छेँ दयेमा। थ्व खँ बांमलाःगु मखु। तर झीगु जःखः थुलि छेँ बढे जुइधुंकल कि आः ल्याः खानां साध्य मजू। उलि छेँया पलेसा सिमा त दुगु जूसा गुलि जिउ? आः ला छेँ छगू ध्यबा कमे यायेगु लँ नं जुयाच्वंगु दु। छेँ तख्खाक दयेकेगु अले छकू�छकू क्वथा बालं बीगु। मनूतय् पेशा जुयाच्वंगु दु। हानं अन च्वनीपिं मनूतय् नं कमी मदु। छगू कथं ला थुकिं यानाः व थासय् यक्व छेँ व मनूतय्गु चाप बढे जुइगु जुल, मेगु उकिं झीगु आरामदायी जीवन नं अस्तव्यस्त जुयाच्वंगु दु। छगू थासं मेगु थासय् वने माल की माःगु स्वयां यक्व हे ताउ बी। एक ला बँ पसःत असंख्य मात्राय् दु, अले व पसलय् मनूत खचाखच, हानं मोटर नं उलि हे, इतःमितः कना जुइपिं मनूत ला गुलि गुलि। थ्व दक्वया कारण अप्वयाच्वंगु छेँ व अनं पिंहा वइगु विकृति खः ।

विकसित थासय् जक लाकालुकु मयासे अविकसित थासय् वनाः नं च्वनेमाः। छेँय् च्वनीपिं मनू यक्व दत धाःसा, व छेँयात माक्व लः गाइ मखु। अले तुं, पम्पू आदि तये माली। थुकिं यानाः जमिनया लः दक्व फुनाच्वंगु दु। जमिन फ्वाफः जुयाच्वंगु खँ ला सिउ हे जुइमाः। उखे गाम्य चाहिँ लः अथें सितिं वनाच्वंगु दु। मनू अप्वः दत कि उमिसं पिकाइगु फोहोरया व्यवस्था यायेत नं थाकुइ। उमिसं न्ह्यःने लाःथाय् फोहोर वांछ्वइ। अले छक्वः फोहोर उठेः मयात कि ला बिजोक हे जुइ ।

छेँ देयेकेबलय् थःगु भतिचा हे जग्गा मवंक थाय् कब्जा याइ। लँयात भचा थाय् त्वःते माल कि थाकुइ। नियमय् मदयेक छेँ थकयाः आकाश थ्यंकी। अले फय् भचा मवयेक, ततःखागु छेँ नं घेरे जुइ। अले छेँ थकायेबलय् संस्कृतियात नं ल्वयेक दयेकेमाः। देगः चैत्यत हे किनाः मछिंक तख्खाक छेँ दयेकी, उकिं व थाय् ला कुरुप हे खने दइ। न्हापाया तुलनाय् आः गुलि नं बाहाबही दु, न्हापं थे चमकं। अय्सां मनूत न्ह्याक्व मछिंसां च्वने हे फु। भतिचा बजाःपाखे ला कम्पाउण्ड छेँ धइगु लुइके हे थाकु। दक्व थिङ्ग धरहरा थें धस्वाकाः पसः बालं बी। थुकिं छेँयात अझ कुरुप अवस्थाय् थ्यंका बी ।

गामय् च्वंपिं मनूत शहरय् थाइ अले शहरयापिं तःमित विदेशय् वनेत स्वइ। अले गामं वःपिं मनूत नं ला हानं न लिहां हे वने चाहे जुइ, न गामय् विकास याः वनेगु बिचाः हे तइ। थय् यानाः गामय् गबलय् विकास जुइ? छकू�छकू क्वथाय् छखलः छखलः मनूत बालं बीबलय् अज्याःगु छेँय् शान्ति दइ मखु। विभिन्न आचरण व स्वभावया मनूत दइ। हानं व छेँनं पिहां वइगु फोहोर ला गुलि गुलि। अप्वः यानाः बालं च्वंपिंसं व छेँयात थःगु छेँ थें माया मयाये नं फु। गुकिं यानाः व छेँयात सम्भार यायां हे ध्यबा सिधयेफु। उकिं ध्यबा जक दक्व मखु। हानं बालं बी हे मजिउ धायेगु नं मिले मजू। थःत माक्व क्वथा कयाः भलाद्मीतय्त जक बालं बी, ध्यबा चाहे न्ह्याक्व हे जुइमा। छेँयात माःसां म्वाःसां थकायाः भूतबङ्गला थें मखु छेँ थें हे दयेकेमाः । अले अन च्वनीपिंसं छेँयात भिंका च्वनेमाः नकि स्यंकेगु। छेँयात देगः थें चिटिक्क दयेकेगु कि भूतबङ्गला थे ग्यानापुसे च्वंक तख्खाक जक दयेकेगु, व ला थःगु हे ल्हातिइ दइ। छेँयात पेशागत रुपं जक माया मयासे थःत गथे माया याना अथे हे माया यायेमाः ।

उकिं छेँखा व मनूत जक बढे जुयां मजिउ। उमित सुरक्षा निसें कयाः दक्व ज्वलंत दत कि तिनि विकसित माने जुइ। आः ला दक्वसिया छगू हे ध्याउन्ना दु, ध्यबा कमे यायेगु अले न्ह्याथे यानाःसां छेँ छखा दयेकेगु, फुसा हानं मेगु, अले हानं मेगु। बुँ दक्व टाउन प्लानिङ्ग व छेँ दनाः दनाः सिधयेधुंकल। आः ला तरकारी दक्व कःसिइ पिउसा जक नयेखनी। तरकारीया भाः थः यत्थे तया तइ ।

गरिबतय्सं ला नये हे म्वाःल। लँ ला छु धकाः, थःत छिंक जक जुइ दुसा ला जि हे जिल नि। लँ ला यक्व दयेकल। तर लँ दयेकूगु नं छेँया भाः थकायेत जक, धाथें थःत मालाः हे मखु। थुकिं यानाः लँ नं यक्व दत, छेँ नं यक्व दत। बुँ मंत ।

More Stories Like this