असमावेशीय भर्ना विरुद्ध मनपाय् नेवाःतय् धर्ना

येँ महानगरपालिकाय् असमावेशीय तरिकां न्हूपिं कर्मचारीतय्त भर्ना याःगु विरोधय् नेवाः स्वायत्त राज्य मंकाः संघर्ष समितिं थौं सुथय् महानगरपालिकाय् धर्ना ब्यूगु दु । संघर्ष समितिं सुथसिया १०:०० इलं निसें १२:०० तक थीथी नारा थ्वयेकाः धर्ना ब्यूगु खः ।

धर्ना ज्याझ्वः नापं जूगु धर्ना सभाय् न्ववापिंसं धर्ना च्वनेगु थःपिनिगु रहर मजुसें बाध्यता जूगु खँ धासें धर्ना लिपा नं सम्बन्धित पक्षं असमावेशीय कर्मचारी भर्ना प्रकृया रद्द मयासाः देय्यंकया ५८गू हे नगरपालिकाय् तालं ग्वयाः ज्या ठप्प यायेगु ख्याच्वः ब्यूगु दु । अथेहे नेपाः सरकारं अन्तर्राष्ट्रिय श्रम संगठन १६९ महासन्धिलय् हस्ताक्षर यायेधुंकूगुलिं आदिवासीतय् अग्रासधिकार सुनिश्चित जुइमाःगु खःसां अझ थुगु महासन्धि लागु मजूनिगुलिं दक्वसितं महासन्धिया बारे थुइकाः वनेमाःगु खँय् बः ब्यूगु दु ।

धर्ना सभाय् संघर्ष समितिया नायः मंगल महर्जन, नेपाः राष्ट्रिय पार्टीया सभासद् बुद्ध साय्मि, माओवादी सभासद् दिलिप महर्जन, नेवाः ज्याकमिः गुथि, येँ मनपाया नायः नरेन्द्र श्रेष्ठ, लोकतान्त्रि नेवाः दबूया न्वकु प्रेम सिंह नकर्मि, नेवाः राष्ट्रिय आन्दोलनया कोषाध्यक्ष सरिता महर्जन, नेपाः राष्ट्रिय पार्टीया महासचिव विजय सैंजु, नेवाः देय् गुथी नेपालमण्डलया मोहन बहादुर महर्जन, ज्यापू महागुथी यलया प्रेम महर्जन, नेपालभाषा केन्द्रीय विभागया प्रोफेसर प्रेम शान्ति तुलाधार, नेवाः विद्यार्थी दबूया नकिं रिसा श्रेष्ठ लगायतं न्ववानादीगु खः ।

संघर्ष समितिं थःपिनिगु माग पूमवंसाः साउन ५ गते येँया ३५गू वडा ज्याकूथी तालं ग्वयेगु, ७ गते कर्मचारी भर्नाया निंतिं अन्तर्वार्ता कायेगु धयातःगु राष्ट्रिय सभागृह जुलुस नापं धर्ना च्वनेगु व ९ गते मनपाया मू ज्याकू बागदरवारय् तालं ग्वयेगु ज्याझ्वः क्वःछिनातःगु दु ।

More Stories Like this