फुक्क हे पार्टीइ 'प्रम'या ल्वापु
छुं हे पार्टीं न्हूगु सरकारया प्रम जुइम्ह ल्यये मफुनि
येँ (सन्ध्या टाइम्स)/सहमतीय सरकार दयेके मफुसेंलि बहुमतीय सरकार हे दयेकेगु धकाः दलतय्सं कुतः याःसां अज्याःगु सरकारया नेतृत्व सुनां यायेगु धइगु खँ धाःसा गुगुं हे दलतय्सं क्वःछीफुगु मदुनि ।
एमाले, कांग्रेस व माओवादीं आः बहुमतीय सरकारया नेतृत्व थःपिंसं हे यायेगु धकाः दावी याःसां उगु पार्टीतय्सं नं अज्यागु सरकारया नेतृत्व याइम्ह नेता सु खः धइगु खँ धाःसा निर्णय यायेफुगु मदुनि ।
वर्तमान कामचलाउ सरकारया नेतृत्व यानाच्वंगु एमालें नं आः बहुमतीय सरकारया नेतृत्व थःपिंसं हे यायेगु धकाः दावी याःसां उगु सरकारय् प्रधानमन्त्री जुइम्ह सु धइगु खँ क्वःछी मफुनि। अन पार्टी अध्यक्ष झलनाथ खनालं सरकारया नेतृत्व याइ धइगु बिचाः पिहां वयाच्वंसां छगू पुचलं धाःसा केपी ओलीयात सरकार दयेके बीमाः धइगु लाइन पित हःगु दु। उखे सहमतिया सरकार दयेके मफुगु कारणं आः माधव नेपालया वर्तमान सरकारयात हे पुनर्स्थापना यायेमाः धइगु सः नं पिहां वःगु दु ।
माओवादी दुने अझ नं अध्यक्ष प्रचण्डं सरकारया नेतृत्व यायेगु खः लाकि उपाध्यक्ष डा. बाबुराम भट्टराईनं नेतृत्व यायेगु धइगु विवाद जुयाच्वंगु दनि ।
उखे कांग्रेसय् नं शेरबहादुर देउवा, रामचन्द्र पौडेल व कुल बहादुर गुरुङ्गं नेतृत्वया दावी यानाच्वंगुलिं समस्या पिहां वयाच्वंगु दु। नेतृत्वया विवादं यानाः आः पार्टी प्रतिपक्षीइ हे च्वनेमाः धइगु सः तकं अन थ्वया वःगु दु। नेतृत्व यायेत पार्टी तयार दुसां नेताया विवाद धाःसा अन तच्वः जुयाच्वंगु दु ।
एमालेया धाःसा थःगु हे तर्क
सरकारया नेतृत्व यायेगु लागिं एमालें नं दावी न्ह्यब्वःगु दु, तर एमालेया नेतृत्वय् दुगु बहुमतया सरकारं नकतिनि राजीनामा बिउगु जूगुलिं आः हानं बहुमतीय सरकार हे दयेकेगु खःसा उकी थःपिं च्वनेगुया औचित्य मदु धइगु तर्क एमाले दुने पिहां वःगु दु। यदि आः एमालें हे सरकार गठन यायेगु खःसा दुई तिहाइ बहुमत वइगु सरकार माः, दुई तिहाई मबीगु खःसा केवल बहुमतया सरकारय् थःपिं मच्वनेगु हे पाय्छि जुइ धइगु तर्क अन पिहां वयाच्वंगु खँ नं सूत्रं धाःगु दु ।
