कांग्रेस पुलांगु गठबन्धनया पक्षय्
येँ (सन्ध्या टाइम्स)/नेकपा (एमाले)या वरिष्ठ नेता माधव नेपालयात प्रधानमन्त्री ल्ययेगु इलय् संविधानसभाय् दुथ्याःगु दलतय्गु दथुइ गुगु कथं गठबन्धन जूगु खः उकियात हे कायम यानाः थःपिनिगु नेतृत्वय् सरकार दयेकेत नेपाली कांग्रेसं तयारी याःगु दु ।
कांग्रेस नेतातय्सं उकिया निंतिं एमाले लगायत मेमेगु चिचीधंगु दलया नेतातलिसे नं अनौपचारिक रुपं सहलह ब्याकूगु खँ एमालेया छम्ह नेतां धयादीगु दु। सभासद्तय्गु बहुमत दयेक दयेकं एमालेया हे आन्तरिक कारणं यानाः प्रधानमन्त्री माधव नेपालं राजीनामा बीगु ज्या जूगुलिं आः पुलांगु हे गठबन्धनयात कायम यानाः थःपिनि नेतृत्वय् दयेकीगु सरकारयात समर्थन यायेमाः धकाः कांग्रेसं एमाले नापं मेमेगु दलया नेतातय्त खँल्हाबल्हा न्ह्याकूगु दु ।
थ्व हे दथुइ मधेशी जनअधिकार फोरम लोकतान्त्रिक, तराई मधेश लोकतान्त्रिक पार्टी नापं मधेशवादी पार्टीतय्सं नं थःपिंत हे समर्थन याइगु दावी कांग्रेस नेतातय्सं याःगु दु।
कांग्रेसया नेतृत्वयात एमाले दुनेया केपी ओली पुचलं समर्थन यायेधुंकूगु दुसा झलनाथ खनाल पक्षधरं धाःसा थःपिनिगु हे नेतृत्वय् दुई तिहाई बहुमतया सरकार दयेकेमाः धकाः कुतः यानाच्वंगु दनि ।
कांग्रेसया कुतः उकुन्हुंनिसें बहुमतया सरकार गठन यायेगुली हे केन्द्रित जुयाच्वंगु खः ।
