अफ्रिकाय् क्वचाःगु थुगुसीया विश्वकप

अफ्रिकी देय् दक्षिण अफ्रिकाय् वंगु लछि तक जूगु विश्वकप फुटबल म्हिगः क्वचाल। थुगुसीया विश्वकप आपालं कीर्तिमानत कायम यासें ऐतिहासिक रुपं सम्पन्न जूगु दुसा थुकिया लागिं दक्षिण अफ्रिकायात कासाया ग्वसाः खलः फिफा लगायत विश्वं हे सुभाय् बिउगु दु। विश्वकप थेंज्याःगु तःधंगु ज्याझ्वः ग्वसाः ग्वयेफुगु दक्षिण अफ्रिकाया थ्व क्षमतां मुक्कं अफ्रिकी महादेशया हे प्रतिष्ठायात च्वय् थकाःगु दु। थुकी रंगभेदविरोधी नेता नेलशन मण्डेलां बिउगु प्रेरणायात च्वछायेमाः ।

थुगुसी जूगु कासाया फाइनलय् म्हितूपिं निगुलिं टिम युरोपियन लात। थुकिं अन्य महादेशयात चसक्क वनीगु स्वाभाविक खः। युरोपं फुटबलयात लागिं गुलि खर्च याइगु खः, व मेपिंसं याये फइ मखु। खर्च याः कथं युरोपं विश्व कप तकं कब्जा याः वःगु मेपिनि लागिं चिन्ताया विषय जुया बिल ।

युरोपय् नं क्लब कासाया आयोजना यानाः विश्वन्यंकंया स्टार कासामित मुंकेत ताःलानाच्वंगु देय् स्पेनं थुगुसी विश्वकप त्याकूगु मेगु ऐतिहासिक घटना जुया बिउगु दु। आः तक गबलें हे विश्वकपया फाइनलय् मथ्यंनिगु स्पेनं थुगुसी न्हापांखुसी फाइनलय् पलाः तयाखतं उपाधि हे त्याकूगु थुकिया कासामितय् तःधंगु साहसया नमूना खः ।

कासाय् त्याःबू जुइगु स्वाभाविक खः। गुलिखे देय्तय्सं थः कासाय् बुत धकाः थः कासामितय्त दण्ड बीगु थेंज्याःगु ज्या तकं याःगु खँ पिहां वल। थ्व गलत खः। अर्जेन्टिनां थः बूपिं कासामितय्त तकं गुगु सम्मान यात, थ्व संस्कार मेपिंसं नं सयेका कायेमाः। कासा व कासामिया मनोबल व प्रतिष्ठा थुकिं हे थकाइ ।

More Stories Like this