कोतिकोति बन्दना

नीरमती वज्राचार्य

छन्हु थःछें लिहां वयाच्वनागु काय् व म्ह्याय्यात निखेर ल्हाः ज्वनाः वया च्वना। स्वयम्भूइ थ्यंक लिहां वनेमाःगु। न्हापा लिपासा झ्वाबाहालय् तक लिहां वःसां गाःगु। आ च्वनेत थाय् मगाना वल। तापाक च्वने मालीगु बाध्यता जुल। स्वयम्भूइ वनेत ट्याक्सी माला जुया। धाधां मधां द्यः खिउँया वल। चैत महिना। वा फय् वइ थे च्वनाः क्षेत्रपाटीइ पिपिउँ ट्याक्सी छगः हे काये मफु। टेम्पु व माइक्रोबस ला थन दुगु मखु। ट्याक्सी बहनी जुल कि स्वयम्भूइ वने म्हाः धाइगु। वने धाःपिंसं नं लाक्वपाक्व ध्यबा काइगु। नियम कानून धयागु दुगु हे मखु। दया माया ला छखे हे ति। ट्याक्सी पिपिउँ हे कायल जुल। उघमय् घननन द्यः न्यानाः वा फ्य नं वल। मत नं फ्वाक्क स्याना हल। क्या फसात ! गथे यानाः छेँ थ्यंकेगु? नुगः भाराभारा मिन। निम्ह निखेर मचात गथे यानाः छे थ्यंकेगु? छेँय् वा वयाः छु जुयाच्वन थें मेगु चिन्ता दनि ।

स्वयम्भूइ वने धाल कि ट्याक्सी म्हाः धाइगु। मेपिं च्वना वःपिं लिसे मिले यानाः च्वने धायेगु तर गबलें दिकीगु हे मखु। मस्त नं जिद्दिपिं। कर्पिं च्वनावःगुसां धयाः च्वने का धाःसा कर्पिं च्वना वःगुली नं झीत तइ ला धाइगु? ख्वख्व मख्व धायेधुंकल। झंझं लिबाना वल। सुनसान जुया वल। मचात आँटे जुइधुंकल। थःथम्हं धिक्कार यानाच्वना। तापाक च्वनेगुया दुःख थ्व हे मखा। कम से कम मोटरसाइकल, स्कूटर जक गये फुगुसा थ्व दुःख ला मदइगु जुइ। न्ह्यागु सयेका तये माःगु हे जुल बा। मसः मसिउ धायेगु जमाना मखये धुंकल। मिसातसें नं थज्याःगु सकतां सयेका तये हे माःगु जुल। द्यःया नां काकां ट्याक्सी पियाच्वना। छगः ला छगः गय् मदइ थें। धाथें विस्तारं छगः ट्याक्सी वयाच्वन। भौचां छुँ लाये थंे क्वथीक स्वयाच्वना। हटपट ट्याक्सीयात निपा ल्हातं रोके याना। ट्याक्सी नं तक्क धायेक दित। ट्याक्सी दुने छम्ह म्हासुगु चिवर पुनाच्वंम्ह शान्त दान्तम्ह भन्ते छम्ह याकःचा च्वना वःगु जुयाच्वन। जिमित खनेवं झासँ झासँ गन झायेत्यनागु धकाः न्यन। जिपिं स्वयम्भूइ अजिमा हल वनेथाय् वनेमाःगु धया। का जिउ जिउ, जि आनन्दकुटी विहार वनेगु च्वनादिसँ धकाः जिपिं मां-म्ह्याय् व काय् स्वम्हेसितं ट्याक्सी दुने तल। ड्राइभरयात जिमित न्हापा तया बीत इशारा यात। बल्ल भाराभारा मिनाच्वंगु नुगःद्यःयात याउँक खन। वा फय् वःगु दिउगु हे मखु ।

विजेश्वरी जुयाः भुइख्यः हल। अनं वनस्थली मार्ग जुयाः छेँय् तक हल। थज्याःगु वा वयाच्वन, ट्याक्सीं हे कुहां वये थाकुल। न्ह्याथे जूसां धकाः स्वम्हं ट्याक्सीं कुहां वया। भन्तेयात नां न्यना। 'भन्ते छलपोलया नां छु थं?' 'जि भन्ते धर्ममूर्ति खः।' वसपोलं कनाबिज्यात। जिं ट्याक्सीया भाडा बीन सना। तर वसपोलं कयाबिमज्याः। म्वाःम्वाः ट्याक्सी जिं कया हयागु खः। दुःख याये म्वाःल, सुयातं सहयोग यायेगु जिमिगु धर्म खः धयाबिज्यात। जिपिं स्वम्हेसिनं भन्तेयात कोतिकोति बन्दना धकाः ल्हाः ज्वजजलपा याना। का विस्तारं झासँ धयाबिज्यात। हस् भन्ते धया ।

छेँय् थ्यनेवं स्वम्हेस्यां थवंथवय् खँ ल्हाना। भन्ते छम्ह नाप मलाःगु जूसा थौं गथे जुइगु थें? द्यवं हे छ्वया हल। उकिं झीसं नं थज्याःगु आपत विपतय् सहयोग याये सयेके हे माः। थ्व नं छगू तःधंगु धर्म खः ।

More Stories Like this