गथे जुल विश्वकप फुटबल?

विश्वकप फुटबलया चय्दँया इतिहासय् न्हापांखुसी अफ्रिकी महादेशया दक्षिण अफ्रिकाय् झिंगुक्वःगु संस्करणया महाकुम्भ क्वचाःगु दु। थुगु विश्वकपय् स्पेन च्यागूगु विश्वविजेता देय् जुइत सफल जुल। आः थुगु विश्वकपया शुरुं निसेंया कासाय् छक्वः मिखा ब्वये:-

थुगु विश्वकपय् मुक्कं ख्वीनिगू कासाय् सछि व पीन्यागू गोल जुल। दकलय् न्हापांगु गोल यायेत सफल कासामि खः दक्षिण अफ्रिकाया सिफिवे साबालालाला। अले दकलय् लिपांगु स्पेनया आन्द्रेस इनेष्टां याःगु गोलया लिसें स्पेन विश्वकप विजेता जुइत नं सफल जुल। कासाय् ह्याटिक याःम्ह छम्ह हे जक कासामि अर्जेन्टिनाया गोन्जालो हिगुइन खः। जर्मनीं दकलय् अप्वः झिंखुगू गोल याःगु दु। अले प्यंगू गोल जक नःगु दु। जर्मनी धुंकाः निगू अंकया गोल यायेत सफल जूगु देय् खः नेदरल्याण्ड (१२ गोल), उरुग्वे (११ गोल) व अर्जेन्टिना (१० गोल)। दकलय् अप्वः गोल जूगु कासा पोर्चुगल व उत्तर कोरिया दथुइ जूगु कासा खः। पोर्चुगलं उत्तर कोरियायात न्हय्गू गोल याःगु खः। लिसें दकलय् अप्वः गोल नःगु देय् नं उत्तर कोरिया हे जूगु दु। उत्तर कोरियां समुह चरणया स्वंगू कासाय् झिंनिगू गोल नःगु खः। दकलय् अप्वः अल्जेरिया व होन्डुरसं थुगु विश्वकपय् छगू नं गोल याये मफुत। दकलय् म्हो फ्रान्स, उत्तर कोरिया व स्वीट्जरल्याण्डं छगू छगू गोल जक याःगु दु ।

स्पेनया डेभिड भिल्ला, जर्मनीया थोमस मुलर, नेदरल्याण्डया वेस्ली स्नाइडर व उरुग्वेया डिएगो फोर्लानं न्यागू न्यागू गोल याःगु दु। दकलय् अप्वः गोल याःम्ह कासामियात 'गोल्डेन बूट' बीगु खः। थुकिया निंतिं प्यम्ह कासामि दाबेदार जूगु खःसां उत्कृष्ट कासा प्रदर्शनया ल्याखं मुलरयात थुगु अवार्ड बिउगु खः ।

थ्व ख्वीनिगू कासाय् निसः व न्यय्निगू म्हासुगु कार्ड क्यंगु दु। थुकी मध्ये नेदरल्याण्डं दकलय् अप्वः नीस्वंगु कार्ड नःगु दु। थ्व धुंकाः चिलीं (१४), जर्मनीं (१२), घानां (११) व उरुग्वें (१०) म्हासुगु कार्ड नःगु दु। अथे हे झिंन्हय्गू ह्याउँ कार्ड कासामितय्सं नःगु दु। अल्जेरिया, अष्ट्रेलिया, ब्राजिल व उरुग्वेया कासामिं निगू निगू ह्याउँगु कार्ड नःगु दु ।

अन्तर्राष्ट्रिय फुटबल महासंघं न्ह्याक्व हे 'फेयर प्ले'या नारा बिउसां उकथं कासा धाःसा म्हिताच्वंगु मदु। थुगु विश्वकपय् दक्वं देशं म्हितूगु कासाय् द्वःछि व न्हय्सः व नीनिगू 'फाउल' प्रहार जूगु दु। दकलय् अप्वः फाउल म्हितूगु देय् नं नेदरल्याण्ड (११५ क्वः) खः। वयां लिपा पाराग्वें (८३ क्वः), उरुग्वें (८० क्वः), मेक्सिकों (७५ क्वः) व ब्राजिलं (७४ क्वः) फाउल म्हितूगु खः ।

थथे हे जर्मनी गोलपोस्टया लक्षित यानाः न्यय्च्याक्वः प्रहार याःगु दु। अर्जेन्टिनां (५७ क्वः), स्पेनं (५२ क्वः) व नेदरल्याण्डं (५० क्वः) लक्षित प्रहार याःगु दु ।

दकलय् अप्वः गोल याःगु ल्याखं जर्मनीया थोमस मुलरं 'गोल्डेन बूट' अवार्ड त्याकेत ताःलाःगु दुसा विश्वकप उपाधि त्याकूगु स्पेनया गोलरक्षक लिसें कप्तान इकेर कासिलासं उत्कृष्ट गोलरक्षकया अवार्ड लिसें 'गोल्डेन ग्लोब्ज'या अवार्ड त्याकूगु दु। उरुग्वेया स्टार स्ट्राइकर डिएगो फोर्लानं उत्कृष्ट कासामिया रुपय् 'गोल्डेन बल'या अवार्ड त्याकेत ताःलाःगु दु ।

(थुगुसी विश्वकपय् म्हितूगु कासाया लिधंसाय्)

More Stories Like this