अक्टोपस पूवंक हे पाय्छि

येँ/थुगुसीया विश्वकप फुटबलयात कयाः 'पल' नांम्ह अक्टोपसं याःगु भविष्यवाणी फुक्क हे सही साबित जुल। म्हिगःया फाइनल कासा तकं अक्टोपसं भविष्यवाणी याः कथं हे स्पेनया पक्षय् वनेवं अक्टोपस पल थुगुसी विश्व कप ति हे चर्चाया विषय जूगु दु ।

थुगुसीया विश्वकप स्पेनं हे त्याकी धइगु संकेत अक्टोपसं म्हीग हे बिउगु खः। लिसें म्हीग हे बहनी स्वंगूगु स्थानया निंतिं जर्मनी व उरुग्वे दथुइ जूगु कासाय् जर्मनी त्याइ धकाः अक्टोपसं भविष्यवाणी याःगु खःसा व नं मिले जुल। थ्व ल्याखं थुगुसी अक्टोपस पलं याःगु फुक्क हे भविष्यवाणी सही साबित जूगु दु ।

स्पेन व जर्मनी दथुइ जूगु कासा नं स्पेनं त्याकी धकाः पलं भविष्यवाणी याःगु खः। धाः गथे अथे हे व कासा स्पेनं हे त्याकल। थुगु विश्वकपय् अक्टोपसं न्हापाया फुक्क हे कासाय् जर्मनी त्याइ धकाः भविष्यवाणी याना वयाच्वंगु खःसा व भविष्यवाणी फुक्कं मिले जुयाच्वंगु नं खः ।

जर्मनी-स्पेन कासाय् जर्मनी बुइ धइगु भविष्यवाणी जुइवं तम्वःपिं आपालं जर्मन फ्यानतय्सं आः थ्व अक्टोपसयात स्यानाः बार्बीक्यु यानाः नयाछ्वःसां जिल धकाः प्रतिक्रिया बिया हःगु खः। गुलिसिनं थ्व अक्टोपसयात म्वाका तये मजिउ धकाः तं प्वंकाहःगु खः ।

अक्टोपस खनाः जर्मन फ्यानत तम्वःगुलिं स्पेनं अथे खःसा उम्ह अक्टोपसया सुरक्षा थःपिंसं यायेगु धकाः छगू प्रस्ताव नापं छ्वःगु खँ सीदुगु दु। थज्याःम्ह अद्भूत अक्टोपसयात न्ह्याथे यानाः सुरक्षा बिया तयेमाः धासें स्पेनं यदि जर्मनीइ वयात खतरा दुसा थःपिंसं सुरक्षितपूर्वक लहीगु प्रस्ताव छ्वःगु खः ।

थ्व अक्टोपसं थनिं निदँ न्ह्यः युरोपियन च्याम्पियनय् नं थुकथंया भविष्यवाणी याःगु खःसा उकी छगू जक कासा मिले मजूगु खः ।

अक्टोपसया भविष्यवाणी फुक्क हे मिले जूगुलिं विश्वया फुक्क हे संचार माध्यमं थ्वयात 'स्टार' दयेका बिउगु दु। थीथी थासय् अक्टोपसया मूर्ति व सालीक तकं दयेकेगु शुरु यानाहःगु दु ।

विश्वकप लिपा आः थ्व अक्टोपसयात स्वः वइपिं मनूतय् ल्याः तसकं अप्वइगु अनुमान याना हःगु दु ।

More Stories Like this