स्पेन त्यायेवं येँय् चान्हय् जुलुस
चान्हय् हे मनूत पिहां वल
येँ (सन्ध्या टाइम्स)/म्हिगः बहनी क्वचाःगु विश्वकप फाइनलय् स्पेन त्यायेवं स्वनिगःया स्वकुमितय्सं चान्हय् हे जुलुस पिकयाः लसता प्वंकल। राजधानीया थीथी थासय् म्हिगः ततपाःगु स्क्रिनय् विश्वकपया फाइनल क्यंगु खःसा कासा क्वचायेवं स्पेनया फ्यानतय्सं चान्हय् हे जुलुस पिकाःगु खः। खास यानाः येँया दुनेया लागाय् च्वंपिं स्वकुमितय्सं मोटरसाइकल गयाः अज्याःगु जुलुस पिकाःगु खः। उमिसं स्पेनया ध्वाँय् नं ब्वयेका वःगु खः ।
गनं गनं स्पेनं अन्तिम इलय् वयाः गोल यायेवं पटाखा नं मुइका हःगु खः। येँ व यलया आपालं सार्वजनिक थासय् ततःपाःगु स्क्रिन तयाः फुटबल क्यनातःगुलिं म्हिगः चान्हय् नं मेला थें लँय् हुलकुल जुइक मनूत खनेदुगु खः। म्हिगः बहनी येँया दशरथ रंगशालाय् नं टिकट कयाः विश्वकप क्यनेगु ज्या जूगु खःसा ठमेल, न्हूगु वानेश्वर, दरवार मार्गय् लाःगु फुक्क धइथें रेष्टुरेन्टय् विश्वकप क्यनेगु ज्याझ्वः जूगु खः ।
कासा सिधयेवं लिहां वंपि स्पेन समर्थक स्वकुति नारा थ्वयेकाः ब्वाँय् वनाच्वंगु खः। कासा सिधयेकाः थौं नं स्वकुमितय् दथुइ कासाया समिक्षा यायेगु ज्या जुयाच्वंगु खनेदु ।
इतिहास सहित उपाधि
येँ/दक्षिण अफ्रिकी राजधानी जोहानेसवर्गया सकर सिटी रंगशालय् जूगु झिंगुक्वःगु विश्वकपया उपाधि स्पेनं त्याकूगु दु। स्पेनं नेदरल्याण्डयात १-० गोलं बुकाः उपाधि त्याकूगु खः
।
निर्धारित ईया कासा गोलरहित जुइवं ३० मिनेट थपे यातं नं उकिया न्हापांगु १५ मिनेट नं गोलरहित जूगु खःसां थुकिया निगूगु हाफय् आन्द्रेस इनेष्टां उत्कृष्ट ढंगं पोस्टया निगूगु बारय् बल प्रहार यासें गोल याःगु खः। विजयया लिसें स्पेनं इतिहास नं कायम याःगु दु। स्पेन विश्वकपय् तःक्वःमछि सहभागी जूसां फाइनलय् थ्यंगु थ्वहे न्हापांखुसी खः ।
कासाया लिपांगु गुंगू मिनेटय् डच कासामि जोनी हेटिंगा निगू म्हासुगु कार्डया लिसें ह्याउँगु कार्ड नयाः पिहां वनेवं झिम्हय् सीमित जूवंगु खः। निगुलिं टीमं गोलया आपालं अवसरयात सही दिशा बी मफुत। कासाय् झिंप्यम्ह कासामिं म्हासुगु कार्ड नयेमाःगु खः ।
फाइनल जुइ न्ह्यः जूगु समापनय् दक्षिण अफ्रिकाया न्हापांम्ह अश्वेत राष्ट्रपति नेल्सन मण्डेला, राष्ट्रपति ज्याकोब जूमा, नेदरल्याण्डया राजकुमार व राजकुमारीपिंसं ब्वति काःगु खः। समारोहय् साकिरां विश्वकपया म्येँ न्यंकूगु खः ।
