येँ मनपाय् नेवाः कर्मचारीतय् पुचः

येँ महानगरपालिकाय् ज्या याइपिं नेवाः कर्मचारीतय्गु संगठन नीस्वंगु दु। मनपाय् जातीय रुपं कर्मचारी संगठन नीस्वंगु थ्व न्हापांखुसी खः। थुकियात अन दुने च्वंपिं मेपिं कर्मचारी, अधिकारी नापं राजनीतिक संयन्त्रं नं स्वीकृति बिउगु कारणं थ्व नेवाः कर्मचारीया पुचःया नैतिक बल अवश्य नं थहां वंगु दयेमाः। येँ महानगरपालिका धइगु नेवाःतय्गु आदिभूमिइ नेवाःतय्गु सेवा यायेगु ताः तयाः स्वनातःगु स्थानीय निकाय खः। उकिं थ्व निकायपाखें स्थानीय नेवाः जनतायात अःपुगु व सुलभ सेवा बीगु थुकिया न्हापांगु कर्तव्य जुइ। येँ मनपां पूवंकेमाःगु थ्व कर्तव्ययात प्रशासनिक रुपं ग्वाहालि बीगु हे थ्व नेवाः कर्मचारी पुचःया भूमिका जुइगु खँय् शंका मदु ।

येँ मनपाय् नेवाः कर्मचारीतय्सं बिस्कं पुचः नीस्वन धकाः मेगु जातिया कर्मचारी वा अधिकारीत आतंकित जुइमाःगु नं छुं आवश्यकता मदु। छाय्धाःसां थ्व पुचः मेगु जातिया कर्मचारीतय् विरुद्ध नीस्वंगु मखु। थुकिं मेगु जातिया हक अधिकार कुण्ठित नं याइ मखु। थ्व ला नेवाःतय्गु थःगु हे अधिकार सुरक्षित यायेत जक नीस्वंगु खः। थःगु अधिकार सुरक्षित यायेबलय् मेपिनि अधिकार हनन जुइ मजिउ धइगु खँ नेवाःतय्सं बांलाक हे सिउ ।

येँ मनपा नेवाःतय्गु आदिभूमिया जनताया निकाय जूगुलिं थ्व पिनें वःपिं मन्त्रीतय् कर्मचारी भर्ती यायेगु अखडा जुइ मजिल। थ्व निकायं दयेकीगु बजेट व कार्यक्रमं आदिवासी नेवाःतय्त अत्यधिक प्रतिफल बी माल। थ्व स्थानीय नेवाः जनताया हक नं खः। मनपाया जिम्मेवार निकायं थ्व खँयात मनन यायेमाल, बस् ।

More Stories Like this