स्पेनयात विश्वकप उपाधि

सन् २०१०या विश्वकप उपाधिइ स्पेनं कब्जा याःगु दु । फाइनल कासाय् नेदरल्यान्डयात १-० गोलं बुका स्पनें न्हापांगु खुसिइ विश्वकप त्याकूगु खः । जोहानसबर्गया सकर सिटी रंगशालाय् जूगु फाइनल कासाया थप समयाया ११६औं मिनेटय् फार्बिगासया पासय् एन्ड्रोस इनेस्टां छगू गोल यानाः स्पनेयात विश्वकप त्याकूगु खः ।

कासा लिपा विश्वकप फाइनलया स्टार जुम्ह इनेस्टां थम्हं छगू चिधंगु योगदान जक यानागु जुसां वहे खँ थःगु टिमयात तःधंगु अविश्वसनीय क्षण जूगु धयादिल ।

कासाया ९० मिनेट तक निगूलिं टिमया पाखें गोल मजुइवं ३० मिनेटया थप समयया निगूगु हाफय् स्पेनं गोल याःगु खः । नेदरल्यान्डया निंतिं गोल यायेगु बांलागु ह्वताःया फाइदा अर्जेन रोबिनं कायेमफेवं स्पेनं उपाधिलय् थःगु कब्जा जमे याःगु खः । थ्व विजयी नापं युरोपियन च्याम्पियन स्पने युरोप पिने जूगु विश्वकप त्याकूगु न्हापांगु युरोपियन देय् नं जूगु दु ।

१४गू यल्लो कार्ड व छगू रेड कार्ड खर्च जूगु कासाय् नेदरल्यान्ड झिम्ह जक कासामि सहित म्हितेत बाध्य जूगु खः । विश्वकपया इतिहासय् स्वक्वःगु खुसिइ फाइनलय् थ्यंगू नेदरल्यान्ड स्वक्वः हे निगूगु थासय् सन्तुष्ट जुइमाल । थ्व स्वयां न्ह्यः नेदरल्यान्ड १९७४ व १९७८य् विश्वकपया फाइनलय् थ्यंगु खः ।

More Stories Like this