चलः वनाः न्याम्ह सित

दुर्घटनाय् प्यम्ह सित

येँ (सन्ध्या टाइम्स)/म्हिगःनिसें देय्न्यंकं मदिक्क वा वयाच्वंगुलिं थाय् थासय् चलः वंगु दुसा उकी लानाः आपालं मनूतय् ज्यान नं वंगु दु। वंगु चान्हय् निगू थीथी थासय् चलः वनाः न्याम्ह मनू सीगु दुसा मेगु छथाय् बस दुर्घटना जुयाः प्यम्ह सीगु दु ।

स्याङ्जाया जोगिस्थानय् वंगु चलखं ल्हानाः मां व काय्म्ह नापं यानाः न्याम्ह सीगु दु। उकी लानाः २७ दँया गंगा महत व वया प्यदँ दुम्ह काय् कुशल महत सीगु खः ।

नेपाली सेना व प्रहरीया न्यय्म्हसिया पुचलं न्ह्याकूगु उद्धारज्याया झ्वलय् उपिं निम्हेसिया सीम्ह लुइकूगु दु। उगु हे छेँया मेपिं खुम्ह मनूयात धाःसा सुरक्षित थासय् यंकेत उद्धार पुचः ताःलाःगु दु ।

अथे हे कास्कीया मिजुरेडाँडा गाविसय् नं चलः वनाः छखा हे छेँया स्वम्ह मनू ल्हानाः सीगु दु ।

मदिक्क वा वयाच्वंगुलिं चलः वनाः उगु गाविसया वडा नं. ८ गहतेया माईला दमाईया छें ल्हानाः वया निम्ह काय् व छम्ह म्ह्याय् सीगु खः। दमाईया १२ दँ दुम्ह काय् राजेन्द्र, ७ दँ दुम्ह काय् शोभाकर व ४ दँ दुम्ह म्ह्याय् सुकमाया उकी लानाः सीगु खः। चलः वनेवं माईला दमाई व वया कलाः धाःसा बिसिउँ वनेत ताःलाःगु खः ।

गाडी दुर्घटना:
उखे डोटी व डडेलधुराया सीमा लागा भातकाँडा धइगु थासय् थौं सुथय् छगः यात्रुबाहक बस दुर्घटना जुयाः प्यम्ह मनू सीगु दुसा ३३ म्ह घाःपाः जूगु दु ।

उगु दुर्घटनाय् लानाः बझाङया मटेला गाविसया ४३ दँ दुम्ह धनबहादुर रावल व चौधरी गाविसया २० दँ दुम्ह अक्कल थापाया जक सनाखत जुइधुंकूगु दु। बझाङं धनगढीपाखे वनाच्वंगु ना. ३ ख ५५५० नम्बरया बस भिमदत्त राजमार्ग अन्तर्गत भातकाँडा लागां १० किलोमिटर दक्षिणपाखे साहुखर्क धइगु थासय् थ्यनेवं थौं सतकं २०० मिटर क्वय् कुतुंवनाः उगु दुर्घटना जूगु खः। उकी लानाः घाःपाः जूपिं मध्ये झिंनिम्हेसिया अवस्था गम्भीर जुयाच्वंगु दु ।

घटनास्थलय् प्रहरीं न्हिनय् तकं उद्धार ज्या न्ह्याकां तुं च्वंगु दनि। घाःपाः जूपिं २२ म्ह यात्रुत धाःसा सामान्य वासः यानाः छेँय् लिहां वनेधुंकूगु दु ।

बर्खाया मौसम वल कि मदिक्क वयाच्वनीगु वां यानाः चलः, खुसिबाः, दुर्घटनाय् लानाः नेपालय् आपालं धनजनया क्षति जुइगु याः ।