कृषिप्रधान देय्या कृषकतय् बिजोग

नेपाः छगू कृषिप्रधान देय् खः नेपाःया अर्थतन्त्रया तःधंगु ब्व कृषिं हे फयाच्वंगु दु। उकिसनं देशय् ब्वलंगु अशान्ति व राजनीतिक अन्यौलया कारणं दुगु उद्योगत नं धमाधम बन्द जुयाच्वंगु व न्हूगु दयेकेगुपाखे कुतः तकं मजुयाच्वंगु थौंया ईयात स्वयाः धायेगु खःसा कृषिप्रति देय्या अर्थतन्त्र अझ अप्वः निर्भर जूवंगु दु। उकिं कृषियात मात्र किसानतय्सं जक मखु अर्थविद्तय्सं नं गम्भीर रुपं कायेमाःगु खनेदु। अर्थतन्त्र अप्वः मात्राय् कृषिइ निर्भर जूगुलिं गुलिखे अर्थविद्तय्सं नेपाःया बजेट हे आकाशं वइगु वर्षाय् निर्भर दु धायेगु याः। थ्व वास्तवय् गलत नं मखु ।

तर कृषिइ थपाय्सकं निर्भर जुइमाःगु देय् खयां नं देशं कृषि विकासया लागिं धाःसा आः तक गबलें हे गम्भीरपूर्वक ध्यान बिउगु खने मदु। उकिया दसु थुगुसी हे नं खने दत। वा पीगु मौसम त्ययेकाः तक नं देय्या थीथी थासय् साः मथ्यनाः किसानत छटपट जुल। छबोरा साः कायेगु लागिं निन्हु स्वन्हु तक न्यासि वयेमाःगु थासं वःपिं किसानत हफ्तौं लाइन च्वनां नं साः काये मखं। थुकिं किसानतय्त निराश याइगु ला द हे दु, उकिया लबः कयाः सीमावर्ती भारतं हःगु गुणस्तरहिन साः बजारय् मी हल। बजारय् जुयाच्वंगु साःया अभावपाखें हाकुबन्जाःतय्सं गाक्क लबः नल। छगू कृषिप्रधान देय्या किसानत छबोरा साः काये मखनाः वाथावाथा कनाच्वन धायेबलय् थ्व ति विडम्बनाया खँ मेगु छु जुइ? जनतायात राहत बी धकाः वयाच्वंपिं राजनीतिक पार्टीत सत्ताया हानथापय् व्यस्त, कर्मचारीतन्त्र नेतातय् चाकरीइ व्यस्त। मेहनत यानाः कमे यायेमाःपिं किसानतय् समस्याय् ध्यान बीगु फुर्सत सुयात?

More Stories Like this