जर्मनी स्वंगूगु थासय्

उरुग्वेयात २-३ गोलं बुका जर्मनी थुगुसीया विश्वकपय् स्वंगूगु थासय् लाःगु दु । अन्तिम ईलय् उरुग्वेया स्ट्राइकर डिएगो फोर्लानया फ्री-किक क्रसबारय् न्यायेवं स्वंगू थाय्या निंतिं कासा त्याकेगु उरुग्वेया म्हगस् समाप्त जूगु खः ।

२-२ गोलया बराबरीलय् कासाया ९० मिनेट जुइत्यंगु इलय् ८२औं मिनेटय् जर्मनीया सामी खेदिरां गोल यानाः जर्मनीयात ३-२ गोलं कासा त्याकेत ग्वाहालि याःगु खः ।

पोर्ट एलिजाबेथय् आइतवाः चान्हय् जूगु कासाया १८औं मिनेटय् जर्मनीं थोमस मुलरया गोलं अग्रता काःगु खः । उगु गोलया झिगू मिनेट लिपा हे उरुग्वेया एडीसन काभानीं गोल यानाः कासायात बराबरीलय् हःगु खः ।

न्हापांगु हाफ तक १-१ गोलया बराबरी कासा म्हितुगु उरुग्वेया निंतिं निगूगु हाफ शुरु जूगु ६ मिनेट लिपा हे फोर्लानं गोल यानाः उरुग्वेयात अग्रता ब्यूगु खः । तर उगु अग्रतायात ताः ई तक निरन्तरता बीमफुत । जर्मनीया निंतिं ५६औ मिनेटय् मार्सेल जान्सेनं गोल यानाः कासायात बराबरी याःगु खः ।

थुगु कासाय् याःगु छगू-छगू गोलया ग्वाहालिं जर्मनीया मुलर व उरुग्वेया फोर्लान थुगुसीया विश्वकपय् आः तक सर्वाधिक गोल याइगु धलखय् नेदरल्यान्डया स्नाइदर व स्पेनया भिल्ला नापं थ्यंगु दु ।

More Stories Like this