जनजातिपाखें आन्दोलन घोषणा

असोज २९ गते मसाल जुलुस, ३० गते स्वनिगः नाकाबन्दी

येँ (सन्ध्या टाइम्स)/नेपाःया आदिवासी जनजातितय्गु मंकाःगु संगठन नेपाल आदिवासी जनजाति महासंघं लच्छियंकं आन्दोलनया घोषणा याःगु दु ।

वंगु असार २३ गतेनिसें चितवनया सौराहय् न्ह्याःगु महासंघया न्हापांगु राष्ट्रिय भेलां थ्व आन्दोलन घोषणा याःगु खः। भेला लिपा थौं सुथय् १६ बुँदाया सौराह घोषणा पत्र जारी यासें आदिवासी जनजातिया हक अधिकार संविधानय् सुनिश्चित यायेमाः धइगु माग यासें दवाव बी कथं थ्व आन्दोलनया ज्याझ्वः दयेकागु खँ जनजाति महासंघं धाःगु दु। संविधानसभाया म्याद दछि थपे याःसां संविधान दयेकेगु निंतिं कार्यतालिका तयार मयासे च्वनाच्वंगुलिं १५ न्हुया दुने हे संविधान निर्माणया कार्यतालिका दयेकेमाःगु, जातीय, भाषिक व ऐतिहासिक म्हसीकाया आधारय् स्वायत्त प्रदेशत तयाः राज्यया पुनर्संरचना यायेमाःगु, जनजाति महासंघ लिसे सरकारं याःगु २० बुँदाया सहमति कार्यान्वयन यायेमाःगु, नेपालं संयुक्त राष्ट्र संघया थीथी घोषणा पत्रयात कानून कथं नाला कायेधुंकूगु जुयाः उकियात कार्यान्वयन यायेमाःगु नापं थीथी कथंया झिंखुगू बुँदाया माग न्ह्यब्वयाः महासंघं आन्दोलन यायेत्यंगु खँ जनजाति महासंघया नायः राजकुमार लेखीं 'सन्ध्या टाइम्स' यात कनादिल ।

नायः लेखीं कनादी कथं साउन २ गतेनिसें ३० गते तक थीथी कथंया संघर्षया ज्याझ्वः जुइ। ज्यझ्वः कथं साउन २९ गते देय्न्यंकं मसाल जुलुस पिकायेगु व ३० गते राजधानीयात प्यखेरं नाकाबन्दी यायेगु ज्या जुइ ।

वय्कलं माग पूरा याकेगु निंतिं देय्न्यंकं आन्दोलन यायेगु नापं इलय् हे माग पूरा मजुल धाःसा अझ सशक्त कथं आन्दोलन यायेत बाध्य जुइ धकाः ख्याच्वः नं बियादीगु दु ।

थथे दु संघर्षया ज्याझ्वः
साउन २ गते देय्न्यंकंया जिल्ला प्रशासन ज्याकुथी ज्ञापनपत्र बीगु। १५ गते तक वाल पेन्टिङ, पर्चा इनेगु, पम्प्लेट तिकेगु। २१ गते पत्रकार सम्मेलन। २४ गते अधिकारमुखी आन्दोलन कथं विश्व आदिवासी दिवस हनेगु। २९ गते देय्न्यंकं मसाल जुलुस पिकायेगु। ३० गते राजधानीयात नाकाबन्दी यायेगु ज्याझ्वः जनजाति महासंघं क्वःछिउगु दु ।