सम्पादकीय

न्हूगु सरकार दयेकेगु लागिं आः तःधंगु राजनीतिक पार्टीत मधेशवादी दलतय्गु लुखाय् ब्वाँय् जुयाच्वंगु दु। एमाले, कांग्रेस व माओवादी स्वंगुलिं पार्टीं मधेशवादी दलतय्त नापलानाः उपिंलिसे सरकार गठन यायेगु इच्छा जाहेर याःगु दु। इच्छा जक मखु, थ्व उमिगु बाध्यता नं खः ।

वास्तवय् थ्व इलय् मधेशवादी दलत सकलें छप्पँ जुयाः तःधंगु पार्टीतय्त थःपिनि मुद्दाय् सहमत याकेत भूमिका म्हितूगु धाथें नं च्वछायेबहःगु ज्या खः। उमिसं संसदीय राजनीतियात थुकथं पूर्ण रुपं उपयोग याःगु खनेदु। अले उमिगु एकताया न्ह्यःने थःपिनिगु छुं लगे मजुयाः तःधंगु दलत सकस्यां उमिगु माग पूवंका बी धइगु बचं सहित उमित थःपिंत ग्वाहालि यायेमाल धकाः इनाप यानाच्वंगु दु। खतुं मधेशवादी दलतय्सं थःपिनि एकताया बलं हे माक्व स्वयां अप्वः उपलब्धी चूलाकूगु धइगु चर्चा थन मजूगु मखु। संसद व सरकार दुने मधेशी समुदायया संख्या उमिसं अथे यानाः हे अप्वयेकूगु खःसा राष्ट्रपति व उपराष्ट्रपति पदय् तकं मधेशी थ्यंगु नं थ्वहे कारणं खः। उपप्रधानमन्त्री पदय् नं मधेशी थ्यंगु दुसा आः उमिसं प्रधानमन्त्री पद तकं दावी यानाच्वंगु दु। देय्या फुक्कं महत्वपूर्ण पदय् मधेशी जक थ्यनीबलय् थ्व नेपाःया बहुजातीय स्वरुपयात गुलि तक ल्वःगु ज्या जुइ, थ्व नं बिचाः यायेमाःगु जुया बी। थःपिनिगु शक्ति दु धकाः राज्यया फुक्क हे महत्वपूर्ण पदय् कब्जा याः वनेगु खःसा थ्व ला मेगु कथंया ब्राम्हणवाद जुल। थुकियात नं थुइकेमाःगु जुइ। मधेशी शक्तिं सरकार गठन याके बीगु जुल धायेवं मेगु जातीय पुचःयात मर्काय् लाइगु ज्या जुइ मजिउ ।

More Stories Like this