राष्ट्रिय खेलकुद धेंधेंबल्ला पाखें नेपाली सेनाया कासामित लितसःतल

राष्ट्रिय खेलकुद परिषद (राखेपं) माओवादीया जनमुक्त सेनायात नं न्याक्वःगु राष्ट्रिय खेलकुद धेंधेंबल्लय् दुथ्याकेगु निर्णय लिपाः नेपाली सेनां थः कासाःमितय् त लित सःतुगु दु ।

न्याक्वःगु राष्ट्रिय खेलकुद धेंधेंबल्लाया निति नियम व प्रकृया विरुद्ध माओवादी जनसेनाया कासामित दुथ्याकेगु निर्णया विरोधयासें नेपाली सेनां मंगलवाःया खुगु कासाःय् थः कासातितय् ब्वति मकायेगु निर्णय याःगु खः । सेनां राष्ट्रिय खेलकुद परिषदं निर्णय मिभंकूतल्ले फुटबल, एथलेटिक्स, भलिबल, तेक्वान्दो, कराते व ब्याडमिन्ट मम्हितिगु जूगु दु ।

मंगलवाः नेपाली सेनाया निम्ह कासामितय्सं एथलेटिक्सय् थःगु कासाः म्हितुगु खसाः मंगलवाया ल्यंदनीगु कासाः न्ह्याःत्यंगु इलय् कासाःमितय्त लितस:तुगु खः । थः कासाःमितय्त लित सःतेगु निंतिं नेपाली सेनाया उच्च अधिकारीत रंङगसाला थ्यंगु खः । नेपाली सेनाया थ्वः पलाःलिपाः राखेप या आकस्मिक बैठक च्वंगु दु ।

अथेहे नेपाल प्रहरी व सशत्र प्रहरीं धेंधेंबल्लाय् ब्वति कायेगु वा मकायेगु खँ दुविधाय् लाःगु दु । नेपाली सेनापाखें धेंधेंबल्ला बहिष्कार यायेवं आः दक्व कासाःत दिनाच्वंगु दु ।

जनमुक्ति सेना नेपाल स्पोर्टस क्लबं चैत २ गते हे राखेपयात न्याक्वःगु राष्ट्रिय खेलकुद धेंधेंबल्लाय् ब्वतिया निंतिं इनाप याःगु खसां सोमवाः प्रधानमन्त्री प्रचण्डया निर्देशन लिपातिनि जनमुक्ति सेनायात दुथ्याकेगु निर्णय याःगु खः ।

More Stories Like this