संग्रहालय प्रमुखया निर्देशनय् लुम्बिनी पुरातात्विक क्षेत्र अतिक्रमण

झीगु स्वनिगः न्हिंपौ

कपिलवस्तुया धनकौली ८ धर्मपुरय् दुगु धनकौली कोट स्थानियबासीं अतिक्रमण याःगु दु । कपिलवस्तु संग्रहालयया प्रमुख कृपाशंकर गुप्ताया स्वीकृतीकथं अज्यागु अतिक्रमण जुयाच्वंगु स्थानीयबासीतय्सं धाःगु दु ।

तिलौराकोट उत्खनन्या झ्वलय् उगु थाय् बुद्धलिसे सम्बन्धित दुगु जुयाः पुरातत्व विभागं उकियात पुरातात्विक क्षेत्र घोषणा याःगु खः । उगु क्षेत्रया संरक्षणया जिम्मा दुगु लुम्बिनी विकास कोष व कपिलवस्तु संग्रहालयं लापरवाही यायेवं स्थानीय गामय् च्वंिपंसं उगु क्षेत्रयात पूर्ण रुपं अतिक्रमण यायेधुंकूगु दु । उगु क्षेत्रय् ५ गू तःग्वःगु स्तूप भवनया भग्नावशेष लुयाः वःगु पुरातत्व विभागं जानकारी ब्यूगु दु । थौंकन्हय् उगु थासय् तरकारी व वा बाहेक छुं स्वयेगु मदु । मालपोत ज्याकूयाकथं धनकौली गाविस क्षेत्रया कित्ता नं. १९२ लुम्बिीनि विकाष कोषया नामय् दु ।

थुखे स्थानीयबासीतय्सं उगु जग्गा ऐलानी जूगु धासें थःपिंसं कब्जा यानागु धयादिल । थःपिंसं कपिलवस्तु संग्रहालयया प्रमुख कृपाशंकर गुप्तालिसे उजं कयाः थुगु क्षेत्रय् वा प्यूगु व उत्पादनया बच्छि हिस्सा वय्कःयात बिइगु यानाच्वंगु उमिसं धाःगु दु ।

पुरातात्विक थाय् कब्जा जूगु धासें स्थानीयबासी धर्मेन्द्र केवटं प्रशासन व पुरातत्व विभागय् वंगु चैत्रय् हे उजुरी तयागु धयादिल । "आःतक छु नं सुनुवाई जूगु मदुनि आः थुकिया अस्तित्व समाप्त जुइ" वय्कलं धयादिल । वय्कःयाकथं कपिलवस्तु संग्रहालयया प्रमुख कृपाशंकर गुप्तां उगु पुरातात्विक जग्गा जोतभाग यायेत उजं ब्यूगु द्वपं बियादिल ।

पुरातात्विक थेंज्याःगु ऐतिहासिक थाय् विनाश जुइकथं थःम्हं सुयात नं कब्जा यायेत व वा पिइत उजं मबीयागु दाबी यासें प्रमुख कृपाशंकर गुप्तां उकियाबारे प्रशासन व पुरातत्व विभागं जानकारी बिइधुंकूगु धयादिल । "जि याकःचां छुं यायेफइमखु । प्रशासनं ग्वाहालि मयाः ।" वय्कलं धयादिल ।

कपिलवस्तुय दुगु एक सय स्वयाः आपालं पुरातात्विक स्थलतय्गु संरक्षणया जिम्मा दुगु लुम्बिीनि विकाष कोषया बेवास्ताया कारण आः थनया पुरातात्विक थाय्त अतिक्रमित जुयाः वनाच्वंगु दु । गुकिया कारण थुकिया ल्याः न्हियान्हिथं म्हो जुयाः वनाच्वंगु दु । मानवीय अतिक्रमण दिकेत व संरक्षणय् च्यूताः मक्यंगु कारण कपिलवस्तुबासीतय्सं छक्वःपतिकं सरकार व संस्कृति मन्त्रालयलिसे ब्यागलं कपिलवस्तु विकास कोष पलिस्थाया निितं माग यानाः वयाच्वंगु दु ।

More Stories Like this