सकलें मधेशवादी दलया लुखाय्

थौं सुथय् माओवादीलिसे व सनिलय् एमालेलिसे वार्ता

येँ (सन्ध्या टाइम्स)/राष्ट्रिय सहमतिया सरकार गठन यायेगु लागिं राष्ट्रपतिपाखें न्यान्हुया ई थपे याना बीवं आः संसदया तःधंगु स्वंगुलिं दलतय्सं हानं छक्वः थःथःपिनि हे नेतृत्वय् सरकार नीस्वनेगु पहलयात तीव्रता बिउगु दु। थ्व स्वंगुलिं पार्टीं आः खास यानाः मधेशवादी दलतय्त थःथःगु पक्षय् सालेगु लागिं कुतः तच्वः याना हःगु खः ।

थ्व झ्वलय् थौं सुथय् माओवादीं मधेशवादी दलतलिसे वार्ता याःगु दु। सिंहदरवारस्थित तमलोपा संसदीय दलया ज्याकुथी च्वंगु उगु बैठकय् सकलें मधेशवादी दल व माओवादी राष्ट्रिय सहमतिया सरकार गठन यायेत तयार जूगु दु। तर सुयागु नेतृत्वय् अज्याःगु सरकार दयेकेगु धइगु निर्णय धाःसा अझं याःगु मदुनि ।

मधेशवादी नेतातय्सं यदि थःपिनि मुद्दायात प्राथमिकता बीगु खःसा थःपिंसं माओवादीयात समर्थन यायेगु खँ धाःगु दु। माओवादीं मधेशया मुद्दायात थःपिंसं न्हापा नं प्राथमिकता बियागु जूगुलिं आः नं थःपिं लिचिले मखु धकाः बचं बिउगु खः ।

उगु बैठकय् माओवादीपाखें अध्यक्ष प्रचण्ड नापं स्वम्हं उपाध्यक्षपिं मोहन वैद्य, डा. बाबुराम भट्टराई व नारायणकाजी श्रेष्ठं ब्वति काःगु खःसा मधेशवादी दलपाखें तमलोपाया महन्थ ठाकुर, फोरम लोकतान्त्रिकया विजय गच्छेदार, सद्भावनाया राजेन्द्र महतोपिंसं ब्वति काःगु खः।
मधेशवादी दलतलिसे म्हिगः नेपाली कांग्रेसं नं वार्ता याःगु खःसा थौं सनिलय् एमालें नं वार्ता यायेत्यंगु दु। मधेशवादी दलतय्सं सुनां थःपिनि मुद्दायात दकलय् अप्वः प्राथमिकता बी, वयात हे समर्थन यायेगु धायेधुंकूगु दु ।

उखे राष्ट्रिय सहमतिया हे सरकार दयेकेमाः धकाः तःधंगु दलतय्त दवाव बीगु लागिं चीधंगु २२ गू दलया बैठक थौं नं च्वनेत्यंगु दु। थुमिगु बैठक नं वंगु छुं न्हि न्ह्यवंनिसें जारी दु ।

शान्तिया खाका दयेकेगु ज्याय् माओवादी
यदि माओवादीया नेतृत्वय् सरकार दयेकेगु खःसा शान्ति प्रक्रियायात गय् यानाः तार्किक निष्कर्षय् थ्यंकेगु खः, उकिया रोडम्याप क्यनेमाः धकाः मेगु दलतय्सं दवाव बियाहःगुलिं माओवादी थौंकन्हय् अज्याःगु रोडम्याप तयार यायेगु ज्याय् नं खटे जूगु खँ सीदुगु दु। शान्ति प्रक्रियायात ताःलाकेगु लागिं थःपिंसं गबलय् गबलय् छु छु ज्या यायेगु धइगु खाका दयेकेगु ज्याय् माओवाद लगे जूगु दु ।