पदय् वनेत नेता-नेता हे तनाव

न्हूगु सरकार गठन यायेगु झ्वलय् तःधंगु पार्टीतय् दथुइ थवंथवय् तनाव व विवाद जुयाच्वंगु ला स्वाभाविक प्रक्रिया हे जुल। यद्यपि देशय् ब्वलनाच्वंगु थौंकन्हय्या परिस्थितियात स्वयाः धायेगु खःसा राजनीतिक पार्टीतय् दथुइ थज्याःगु कचवं ब्वमलंसा बांलाः। तर विडम्बना छु धायेबलय् थौं सरकार गठनया ज्याय् पार्टी-पार्टी दथुइ जक मखु छगू हे पार्टी दुने नं निम्ह नेता-नेताया दथुइ हे थवंथवय् तनाव सिर्जना जुयाच्वंगु दु। नेपाली कांग्रेस दुने रामचन्द्र पौडेल व शेरबहादुर देउवाया दथुइ छम्हं मेम्हेसित प्रधानमन्त्री मदयेकेगु अभियान न्ह्यानाच्वंगु दु। अथे हे एमाले दुने झलनाथ खनाल व खड्ग ओली दथुइ नं छम्हं मेम्हेसित प्रधानमन्त्री दयेके मबीगु कुतः न्ह्यानाच्वंगु दु ।

अथे हे माओवादी दुने नं अध्यक्ष प्रचण्ड व वरिष्ठ नेता डा. बाबुराम भट्टराई दथुइ छम्हं मेम्हेसित निषेध यायेगु कुतः जुयाच्वंगु दु। थ्व स्वंगुलिं पार्टीया नेतातय् दथुइ थज्याःगु अवस्था दु कि उपिं माल धाःसा बरु सरकारया नेतृत्व हे मेगु पार्टीयात लःल्हायेत तयार दु, तर थम्हं नेतृत्व याये मखनीगु खःसा थःगु हे पार्टीयात तकं नेतृत्वं बञ्चित यायेत उपिं उद्यत जुयाच्वंगु दु। पदय् वनेगु लोभं थीथी पार्टीया नेता-नेतातय् दथुइ हे ब्वलनाच्वंगु थ्व अवस्था तसकं ग्यानापु। थुकिं कन्हय् वनाः पार्टीयात छप्पँ याना मतइगु जक मखु, अज्याःगु हे संकटया अवस्था वल धाःसा पार्टी हे विभाजन जुइगु तकं स्थिति वयेफु। लिसें पार्टीया नेतातय्के थज्याःगु लोभ ब्वलन धाःसा अन दुने प्रतिगामी तत्वतय्सं नं म्हितेगु थाय् दया बी। थ्व लोकतन्त्रयात स्थायी यायेगु सन्दर्भय् बांलाःगु संकेत मखु। नेतातय्सं थःपिंत सुधार याये हे माः ।

More Stories Like this