न्हापांगु पटक स्पेन फाइनलय्

इंग्ल्यान्ड व अर्जेन्टिनायात ४ गोल याःगु जर्मनीयात ०-१ गोलं पराजित यासें स्पेन न्हापांगु पटक विश्वकप फाइनलय् प्रवेश याःगु दु । थ्व नापं प्यंक्वःगु खुसीइ विश्वकप त्याकेगु जर्मनीया म्हगस क्वचाःगु दु ।

डर्बान रंगशालाय् बिहीवाः चान्हय् जूगु निगूगु सेमि-फाइनल अन्तर्गत जर्मनी व स्पेन दथुइ जूगु कासाया अधिकांश ई स्पेनं जर्मनीयात दबावय् तःगु खःसा गोल यायेत तःक्व हे कुतः यानाः जर्मनीया गोलकिपरयात नं दबावय् तःगु खः ।

युरोपियन च्याम्पियन स्पेनया निंतिं ७३औं मिनेटय् कर्नर किकय् फुयोलं हेडिङ मार्फत छगू जक गोलया ग्वाहालिं फाइनलया यात्रा तय याःगु खः । सन् २००८या युरोपियन च्याम्पियनशिपया फाइनलय् नं स्पेनं जर्मनीयात १-० गोल अन्तरं हे पराजित याःगु खः ।

आः स्पेनं ११ जुलाईया बहनी जोहानसबर्गया सकर सिटी रंगशालाय् नेदरल्यान्डसया सामना याइ । नेदरल्यान्डसं सेमिफाइनलय् उरुग्वेयात ३-२ गोलं पराजित यानाः फाइनलय् प्रवेश याःगु खः ।

More Stories Like this