उरुग्वेयात पराजीत यानाः नेदरल्यान्डस फाइनलय्

दक्षिण अफ्ररिकाय् जुयाच्वंगु विश्वकपया न्हापांगु सेमि-फाइनलय् उरुग्वेयात २-३ गोल अन्तरं पराजीत यासें नेदरल्यान्डस विश्वकप उपाधि नापं थ्यंगु दु ।

विश्वकपया इतिहासय् थुगुसी नेदरल्यान्डस स्वक्वःगु खुसीइ फाइनलय् थ्यंकेत ताःलाःगु खःसा स्वक्वःगु खुसीइ फाइनलय् थ्यंकेत नेदरल्यान्डसयात ३२दँ पीमाःगु खः । थ्वस्वां न्ह्यः सन् १९७८य् नेदरल्याडस अर्जेन्टिना नाप फाइनलय् पराजीत जूगु खः ।

केपटाउन स्थित ग्रीन पोइन्ट रंगशालाय् जूगु कासा १८औं मिनेटय् नेदरल्यान्डसया निंतिं जिओभानी भान ब्रोङ्खस्टं ३०र्याड तापाकं गोल याःगु खः । न्हापांगु हाफया ४१औं मिनेटय् उरुग्वेया डिएगो फोर्लानं गोल यानाः कासायात बराबरीलय् हःगु खः ।

न्हापांगु हाफ तक १-१ गोलया बराबरीइया कासा म्हितुसां निगूगु हाफ शुरु जुइवं उरुग्वें आक्रामक कासा म्हितुगु खःसां गोल धाःसा यायेमफुत । लिपा कासाया ७०औं मिनेटय् वेस्ले स्नाइडरं नेदरल्यान्डसया निंतिं निगूगु गोल याःगु खः । उगु गोलया स्वंगूगु मिनेट लिपा हे आर्जेन रोबेनं मेगू छगू गोल थप याःगु खः ।

उरुग्वेया निंतिं इन्जुरी समयया निगूगु मिनेटय् म्याक्सिमिलानों निगूगु गोल याःगु खः । थ्व नापं दक्षिण अमेरिकया दक्वं राष्ट्र थुगुसीया विश्वकपं पिहावंगु दु ।

फाइनलय् नेदरल्यान्डसया सामना याइगु राष्ट्र निर्धारण यायेत थौं जर्मनी व स्पेन दथुइ प्रतिस्प्रर्धा जुइत्यंगु दुसाः उगु कासाय् पराजीत जुइगु राष्ट्रं स्वंगूगु थाय्या निंतिं उरुग्वे नाप प्रतिस्प्रर्धा याइ ।

More Stories Like this