तता केहेँ हिरोइनपिं

विजयरत्न असंबरे

बलिउडय् परिवारया छम्ह दुजः फिल्मय् ज्या याइम्ह जुलकि मेम्ह दुजः नं उखेपाखे हे स्वया वइगु दसु यक्व हे दु । थनं परिवारया दक्वः दुजः बारे मखसे छम्ह हे मांया निम्हं म्ह्याय्पिंहिरोइन जुया हे बलिउडय् ज्या यानाच्वंगु छुं छुं दसु जक कुला स्वय्गु कुतः जुइ ।

अनिल कपुर व ज्यकी श्राफ दुगु 'अन्दर बाहर' फिल्मय् हिरोइन जुया बंगाली फिल्म पाखें बलिउड दुहाँ वःम्ह मुनमुन सेनया निम्ह म्ह्याय्िपं रिमा सेन व रायमा सेन निम्हं बलिउडय् हिरोइन जुया दुहाँ वःगु खः । थथे निम्हं तःकेँहेपिं फिल्मय् वःसां निम्हं नापं छगू हे फिल्मय् म्हितूगु दसु धाःसा आःतकया दुने शिल्पा शेट्टी व समिता शेट्टीं म्हितूगु छगू फिल्म 'फरेब' त्व:ता मेगु मदुनि । सन् १९९० या दशकय् हिन्दी फिल्मय् दुहाँ वःम्ह शिल्पा शेट्टीयात बलिउडय् छम्ह नांजाम्ह हिरोनी कथं कयातःगु दुसा केँहे मय्जु समिता शेट्टीं तता शिल्पाया न्हाय् तये मफुनि ।

काजोलयात बलिउडया छम्ह धिसिलाम्ह हिरोइन कथं काइ । न्यादँति न्ह्यवः अजय देवगनलिसे ईहिपा याना फिल्म पाखे तापाना वंम्ह काजोलया केँहे तनिषा नं थउनेनिसें हिरोइन जुइगु यात्रा न्ह्याकूगु दु । ट्यांगो चार्ली सरकार नील एण्ड नी की थेंज्याःगु निगू प्यंगू फिल्म म्हितेधुंकूम्ह तनिषाया फिल्मी लजगा अपाय्सकं तालाय्फूगु खनेमदुनि । थौंकन्हय् हिरोइनतय् दथुइ अ¨ प्रदर्शनया धेंधेंबल्ला जुयाच्वंगु व पि्रयंका चोपरा लारा दत्ता नेहा धुपिया मलिका शेरावत थेंज्याःपिं हिरोनीत अंग प्रदर्शनया हुिनं हे चर्चित जूगु खना 'नील एण्ड निकी' फिल्मय् जियांजिक्वः थःगु म्ह ब्वया क्यंम्ह तनिषाया उगु फिल्मं बांलाक बनेज्या यायमफुबले वय्कः मय्जुया फिल्मी यात्राय् पंगः जूवंगु दुसाः काजोल फिल्म लागां तापाना च्वंगु ताः ई दसाँ छम्ह मचाया मां जुइधूंकुसां हिरोइन कथं 'डिमाण्ड' दुम्ह कथं न्ह्यःने लाय्त ताःलाःगु दु ।

तनिषाया तता काजोलं ताः ई लिपा हाकनं 'फनाह' नांयाःगु छगू फिल्मय् हिरोइन जुसें हाकनं थःगु यात्रा न्ह्याकेत्यंगु दु । 'हम तुम' थेंज्याःगु लोकंव्हाःगु फिल्मया निर्देशक कुणाल कोहलीया निर्देशनय् दयेकाच्वंगु 'फना' फिल्मय् काजोल लिसे अमिर खान हिरो जुया म्हितेधुंकूगु दु । थथे ताः ईया दिपा धुंकाः नं थःगु यात्रा न्ह्याकेफुम्ह काजोल व केँहे मय्जु तनिषाया मां तनुजा नं पुलांम्ह हिरोइन हे खः । उलिजक मखुसे तनुजाया तता नूतन नं नां दंम्ह हिरोइन खःसा नूतन व तनुजाया मां शोभना समर्थ नं थःगु इलय् हिरोइन जुया फिल्म म्हिते धुंकूम्ह खः ।

पुलांपिं हिरोइन मुनमुन सेन तनुजाया म्ह्याय् पिं फिल्मय् वथंेतुं बबिताया म्ह्याय् पिं नं फिल्मय् हे वःगु खः । बबिताया तःधिकम्ह म्ह्याय् करिश्मा कपुरं छगू इलय् बलिउडय् तसकं नां व दाँ कमे याःगु खःसा थौंकन्हय् करिश्माया केँहे करीना कपुर नं लोकंव्हाःम्ह हिरोइनया रुपय् न्ह्यानाच्वंगु दु । थःगु ईहिपा लिपा अभिनय पाखें दिपा काम्ह करिश्माया छगू ताः ई निसें दयेकाच्वंगु फिल्म 'मेरे जीवन साथी' आः वया तिनि सार्वजनिक जूगु दुसा थुके वय्कः मय्जुया ज्याया प्रसंशा जूगुलि हाकनं फिल्मय् लिहाँ वय्गु मन दयेका च्वंगु दु । खास याना तताम्ह लोकंव्हाःसां केँहेम्ह उलि तालाय्मफूगु बलिउडय् करिश्मा धुंकाः करीना नं उतिग्यंक हे तालाक ज्या याना क्यना छगू न्हूगु दसु जुया ब्यूगु दुसा फरहाया केँहे मयजु तब्बुला तताम्हसिबें यक्वः हे न्ह्यःने वनेत ताःलाःगु खः ।

मेमेपिं तःकेँहे हिरोइन मध्ये पदमीनी कोल्हारेया केँहे तेजस्विनी कोल्हापुरेया हिरोइन जुइगु यात्रा उलि ताःलाक्क न्ह्याय् हे मफयाच्वंगु दुसा शिल्पा शिरोडकर व केँहे नम्रता शिरोडकर निम्हेसियां पलाः बलिउडय् थातय् लाये मफुबले निम्हसिनं ईहिपाया लँपु ज्वना अभिनयया लँपु त्वता वंगु खः । सलमान खान लिसे 'बागी' म्हितुम्ह नगमा व अक्षय खन्नालिसे 'डोलि सजा के रखना' म्हितुम्ह नगमाया केँहे ज्योतिकाया पलाः नं बलिउडय् क्वातुइ मफुबले तताम्ह भोजपुरी फिल्म पाखंे व केँहेम्ह त्यलाःगु फिल्मपाखे स्वया वनेमाःगु खः । छगू इलय् तसकं बय्बय् जूम्ह डिम्पल कपाडिया केँहे सिम्पल नं अनुरोध लुटमार थेंज्याःगु फिल्म धुंकाः तना वनसा डिम्पलया निम्ह म्ह्याय् पिं ट्वींकल परींकी मध्ये तताम्हसिया पलाः छुं भतिचा क्वातुसां केँहे रींकीया ज्या ताःलाय् मलाबले इमिस नं ईहिपाया लँ ज्वना फिल्मया लँ त्वताः वंगु खः । अथेहे तुं आइरम गर्लया रुपया नां कमे याम्ह लाय्का अरोराया नुगः फिल्म पाखे सिबें मोडिल¨ व मेमेगु ज्यापाखे अप्वः क्वसाबले फिल्मयात ध्यान मबिलसा वय्कः मय्जुया केँहे अमृता अरोराया पलाः धाःसा बलिउडय् न्हियान्हिथं सुथां लाना वयाच्वंगु दु ।

More Stories Like this