संविधानसभा पिने बम मुल

येँ (सन्ध्या टाइम्स)/न्हूबानेश्वरस्थित संविधानसभा भवन पिने थौं सुथय् बम मुल। मूगु इलय् अन तसकं सः वःगु नापं उगु इलय् छझाः आतंक नं ब्वलंगु खः ।

संविधानसभा भवन न्ह्यःने बानेश्वर दुवातय् उगु बम मूगु खः। तर उकिं मानवीय क्षति धाःसा मजूगु खँ प्रहरीं धाःगु दु। विष्फोट जूगु थासय् डाइनामिक युथ फोरम नांगु संस्थाया पर्चा ह्वलातःगु दु ।

उगु पर्चाय् संविधानसभाया म्याद थप याःगु विरोधय् थ्व बम मुइकागु खँ च्वयातःगु दु। मोटरसाइकलय् वःपिं निम्ह मनूत अन बम वांछ्वयाः बिसिउँ वंगु खँ प्रत्यक्षदर्शीतय्सं धाःगु दु।
संविधानसभा भवनय् स्वंगू दलया बैठक क्वचाःगुयां छुं ई लिपा हे थ्व विष्फोट जूगु खः ।

थौं संविधानसभा ज्याकुथी मू मू राजनीतिक दल एकीकृत माओवादी, नेपाली कांग्रेस व एमालेया नेतातय् दथुइ बैठक च्वंगु खः। उगु बैठकय् चैत्र मसान्त तकया दुने न्हूगु संविधान दयेकेगु धकाः सहमति जूगु खः ।

संविधानसभाया अध्यक्ष सुवास नेम्वाङया कुतलय् जूगु उगु बैठकं आः संविधानसभाय् दुथ्याःगु मेमेगु दलतलिसे नं सहलह ब्याकाः संविधानसभाया कार्यतालिका दयेकेगु खँ क्वःछिउगु दु। स्वंगू दलया उगु बैठकं थ्वहे वइगु २६ गते हाकनं मेगु बैठक च्वनीगु जूगु दु। बैठकय् राज्य पुनर्संरचना आयोग वइगु साउन महिनाया दुने दयेकेगु धकाः तकं सैद्धान्तिक सहमति जूगु दु ।


न्हूसतकय् बम आतंक
येँ(सन्ध्या टाइम्स)/ येँया तसकं व्यस्तगु लागा न्हू सतकय् म्हिगः सनिलय् बम आतंक जुल। अनया छखा छेँय् छुं मनूतय्सं त्वःतावंगु ब्रिफकेसय् बम दयेमाः धइगु आशंकां यानाः आतंकित जूगु खः ।

लिपा बम डिस्पोजल पुचः वयाः न्हू सतकया मू लँय् दथुइ तयाः उगु बम डिस्पोज याःगु खः। तर उकी बम धाःसा मदुगु खँ धाःगु दु। उगु ब्रिफकेस लिपा प्रहरीं हे थप अनुसन्धानया लागिं ज्वना वंगु खः ।