प्रमया राजीनामां अलपत्र जूगु बजेट

देशय् न्हूगु बजेट जारी यायेमाःगु इलय् लाक्क वयाः प्रधानमन्त्री माधव नेपालं राजीनामा बियादीगुलिं बजेट अलपत्रय् लाः वंगु दु। न्हूगु बजेट पेश यायेत धकाः सरकारं संसदया ताल्लाया अधिवेशन नं सःतेधुंकूगु दु। तर अधिवेशन सःतूसां अन पेश यायेमाःगु बजेटया धाःसा आः तक ठेगान हे मदुनि। इलय् बजेट पेश याये मफुत धाःसा उकिं थीथी कथंया समस्या पिहां वइगु ला द हे दु। इलय् हे पेश वःसां नं उकिं निर्दिष्ट याःगु नीतित कार्यान्वयन यायेत तसकं थाकु। थुगु दँया बजेटं फ्यानातःगु ध्यबा मेगु बजेट वयेत्ययेकाः तिनि हथासं खर्च याइगु चलन आः तक दनि। थज्याःगु अवस्थाय् झन् लिबाक हे बजेट वइबलय् अर्थतन्त्रय् लिच्वः लाइगु स्वाभाविक हे खः। पूरक बजेट वये लिकाइगु जूगुलिं आः सरकारं पेश्की बजेट निं हयेगु तयारी यानाच्वंगु दु। देशय् निगूगु जनआन्देालन लिपा निक्वः तक पेश्की बजेट हे वःगु खः। थ्व नापं जुल धाःसा स्वक्वः जुइ। नियमित बजेट गडबड जुल कि हे थज्याःगु पेश्की बजेट पेश याये मालीगु खः ।

खतुं देय्या अर्थतन्त्र आः थुलि स्यनेधुंकल कि उकी हानं छुं स्यनी धकाः चिउताः कयाच्वनेमाःगु हे आवश्यकता मंत धाइपिं नं मदुगु मखु। खास यानाः राजनीतिक अस्थिरता व राजनीतिक पार्टीया नेतातय्सं यानाः देय्या थ्व अवस्था वःगु खः। राजनीतिक पार्टीया नेतातय् थःपिनि स्वार्थ पूवनी कथंया ज्या मजूतले अर्थतन्त्र लगायत फुक्क हे ज्यायात दिका हे तयेगु प्रवृत्तिं यानाः नं देय् न्हियान्हिथं जटिल अवस्थापाखे वनाच्वंगु खः। अर्थतन्त्रयात थप जटिल मयायेगुपाखे पार्टीतय्सं ध्यान बीमाःगु स्थिति वयाच्वंगु दु ।

More Stories Like this