कुमारीया भत्ता वृद्धि

शिला साय्मि

२०४६ सालया प्रजातन्त्र लिपा सर्वोच्च नेता गणेशमान सिंह छक्वः कुमारीयाथाय् सिन्हः तीत झाःगु जुयाच्वन। थ्वहे मौकाय् लाकाः कुमारी माजुया चिताइदारपाखें छगू निवेदन यात। कुमारीया निंतिं भत्ताया व्यवस्था जुइमाल। ख नं खः, कुमारी थेंज्याःगु द्यःया सम्मान कायेधंकूपिं म्ह्याय्मस्त कुमारी मखये धंुकाः छुं हे कथंया सुविधा दइ मखु। थ्व खँ थुइकाः वय्कलं बसन्तपुली जूगु न्हूदँ समारोह समितिया ज्याझ्वलय् पूर्व कुमारीया निंतिं भत्ताया व्यवस्था जुइगु खँ घोषणा यानादिल। न्हापां कुमारी नापं गणेश व भैरव स्वम्हेसितं द्वःछि तका निसें थुगु भत्ता बीगु शुरु जूगु खः। २०५८ साल जेष्ठ १८ गते राजदरबार हत्या काण्ड लिपा राजनैतिक परिवर्तन जुल। राजनैतिक परिवर्तनया लिच्वः कुमारी, गणेश व भैरवया निवृत्ति भत्ताय् नं लाः वन। वय्कःपिनि भत्ता रोके जू वन। उकिया नापनापं वर्तमान कुमारीया शैक्षिक भत्ता नं रोके जुल ।

खँ थुकथं न्ह्याना वन। वर्तमान कुमारी ओपन हाउस इंग्लिस सेकेण्डरी स्कुलया विद्यार्थी खः। अय्सां वसपोल कुमारीया नियम कथं स्कूल मवँसे कुमारी छेँय् हे च्वनाः अध्ययन यानाबिज्याइ। कुमारीपाखें स्कूलया फी बुझे मयासेंलि स्कूलपाखें उकिया बिल कुमारीछेँय् छ्वया हल। समस्या जुल। उकिं समस्या समाधानया निंतिं छेँया चिताइदार ज्ञानदेवी शाक्यपाखें पहल शुरु जुल। वय्कःया हे पहल कथं थौं वर्तमान कुमारी, गणेश व भैरवपिनि श्रीपद भत्ता वृद्धि जूगु खः। थुगुसीनिसें थ्व भत्ता २५ प्रतिशत बढे जूगु खः। वय्कःपिं नापं पुलांपिं कुमारी, गणेश व भैरवया भत्ता नं वृद्धि जूगु खः। थुगु समस्यायात कयाः चिताइदारया प्रतिनिधि कथं गौतम शाक्य नापं वर्तमान कुमारी माजुया अबु प्रतापमान शाक्यपिंसं संस्कृति मन्त्रालयय् छगू निवेदन तयादिल। उकी संस्कृति मन्त्रालयया सह-सचिव जलकृष्ण श्रेष्ठं ग्यसुग्यंगु सल्लाह बियादिल। कुमारीया निंतिं शैक्षिक खर्च न्हापा राजदरबारपाखें व्यहोरे याना वयाच्वंगु खः। उकिं थुगु प्रस्ताव छक्वः राष्ट्रपतियाथाय् तःसा बांलाइगु सुझाव वय्कलं बियादिल। सल्लाह कथं २०६५ साल पौष ४ गते राष्ट्रपति रामवरण यादवयाथाय् छगू निवेदन तल। उगु निवेदनय् नेपाल सरकारपाखें नीतिगत रुपं हे वर्तमान गणतान्त्रिक राजनैतिक परिवेशय् वर्तमान कुमारीया शिक्षाया ग्यारेन्टी सरकारपाखें कायेमाःगु खँ न्ह्यथना तःगु जुयाच्वन। पत्र स्वयाः राष्ट्रपतिं सहर्ष स्वीकृति बियादिल। नापं अर्थ मन्त्रालयय् छ्वयादिल। अर्थ मन्त्रालयं तोक लगे जुयाःलि २०६६ साल कार्तिक १८ गते मन्त्रिपरिषद् बैठकं भत्ता सम्बन्धी नीति पारित यात। आः थ्व भत्ता संस्कृति मन्त्रालय अन्तर्गत कौशी तोषाखानापाखें बीगु व्यवस्था जूगु दु। थ्व भत्ता वृद्धि वइगु श्रावण १ गते निसें लागू जुइ। थुलि जक मखु पुलांपिं कुमारी, गणेश व भैरवया रोके जुयाच्वंगु भत्ता नं थुकिया नापनापं बढे जूगु दु ।

ईया हिउपाः कथं खर्च बढे यायेमाःगु ला जु हे जुल। थ्व झ्वलय् छगू न्ह्याइपुगु प्राविधिक गडबडी नं जूगु जुयाच्वन। चिताइदारपाखें तःगु निवेदनय खुलाया जक रकम उल्लेख यानाछ्वःगु लानाच्वन। संस्कृति मन्त्रालयया स्वीकृति वःबलय् दछिया फी व्यहोरे यायेगु कथं स्वीकृत जुल। अर्थ मन्त्रालयं ध्यबा काः वंगु इलय् दछिया धकाः खुलाया फी जक बीगु धयाहसेंलि ज्या हानं अलमल जुल। लिपा हाकनं दछियागु हे निंतिं पत्र ज्वनाः संस्कृति मन्त्रालय वंगु बखतय् निवर्तमान कुमारीया भत्ता नं बढे यायेमाःगु माग न्ह्यथनाछ्वःगु जुयाच्वन। गुगु मागयात संस्कृति मन्त्री मिनेन्द्र रिजालं तोक लगे यानाः अर्थ मन्त्रालयय् छ्वया बिल। थुगु कथं हाकनं छगु मेगु उपलब्धी चूलात। आः वर्तमान कुमारी, गणेश, भैरवया शैक्षिक खर्च नापनापं श्रीपद भत्ता अले पुलांपिं कुमारी, गणेश व भैरवपिनि नं निवृतिभत्ता २५ प्रतिशत वृद्धि याःगु दु। आः वर्तमान कुमारीया भत्ता लय् ६०००/- तका नापं गणेश व भैरवया ३०००-३०००/- तका भुगोलपार्कया नेपाल बैंक लिमिटेडय् जम्मा जुयाच्वंगु दु। अथे हे पुलांपिं कुमारी, गणेश व भैरव मध्ये नं पुलांम्ह कुमारीयात लय् स्वद्वः तकाव गणेश व भैरवयात झिंन्यासः-झिंन्यासः तका अन हे जम्मा जुयाच्वंगु दु। थुगु भत्ता सरकारं थुगुसी २५ प्रतिशत वृद्धि याःगु खः ।

थुगु उपलब्धीया निंतिं कुमारीछेँया चिताइदारपाखें सरकारयात सुभाय् देछाःगु दु। चिताइदारया प्रतिनिधि गौतम शाक्यं थौंया आवश्यकता कथं आः पुलांपिं कुमारी, गणेश व भैरवया निंति स्वास्थ्य, शिक्षा व रोजगारीया ग्यारेन्टी सरकारं याना बिउसा अझ बांलाइगु बिचाः प्वंकादिल ।

नेपाल सरकारपाखें जक मखु हनुमानढोका दरबार क्षेत्र संरक्षण समितिपाखें नं २०५२ सालंनिसें वर्तमान कुमारीयात लय् २५,०००/- तका दां भत्ता कथं बियातःगु दु। अथे हे चिताइदारयात नं १५००० तका भत्ता बियातःगु दु। थुगु भत्ता धाःसा छुं ठेगान मदुगु जुयाच्वन। हनुमानढोका दरबार क्षेत्र संरक्षण समिति दत्तले जक थ्व भत्ता कुमारी व चिताइदारयात खँ उल्लेख दु। थुगु भत्ता नापं पुलांपि कुमारीपिनि विवाहखर्च कथं १०,००० तका नं सरकारं बीगु व्यवस्था यानातःगु दु ।

More Stories Like this