बाह्य रिंगरोड मदयेकेत अभियान

स्वनिगः दुने दयेकेगु धकाः सरकारं प्रस्तावित यानातःगु छगू महत्वाकांक्षी परियोजना खः बाहिरी रिंगरोड। चीन सरकारया ग्वाहालिं दयेकीगु थ्व चक्रपथ निर्माणं स्वनिगःया शहरीकरणं छगू न्हूगु हे मोड काइगु विश्वास यानातःगु दु। थुकिया लागिं सरकारं थःपिनिगु हरेक बजेटय् ध्यबा निकासा यानाः ज्या नं न्ह्याकाच्वंगु दु ।

तर सरकारया थ्व परियोजनायात स्वनिगःया स्थानीय नेवाः जनतां विरोध यानाच्वंगु कारणं थुकियात अःपुक न्ह्याके धाःसा फयाच्वंगु मदुनि। गुगु थासं थ्व लँपु न्ह्याः वनेमाःगु खः अन हे च्वंपिं स्थानीय जनतां समेत थुकिया विरोध याना हःगु कारणं परियोजना न्ह्याये फयाच्वंगु मदुनि। थ्वहे झ्वलय् आः नकतिनि नेवाः स्वायत्त राज्य मंकाः संघर्ष समितिं राष्ट्रिय योजना आयोगय् हे वनाः उगु रिंगरोडयात कयाः थःपिनि सरोकार क्यंगु दु। उगु रिंगरोड दयेकेगु लागिं सरकारं दँय्दसं बीगु याना वयाच्वंगु बजेट थुपालय् मफ्यायेत इनाप यासें योजना आयोगयात नेवाः सरोकार क्यंगु खः ।

थौंकन्हय् जग्गा दलालतय् लागिं जग्गा कारोवार यायेगु छगू बांलाःगु मसला जुयाच्वंगु बाह्य रिंगरेड दयेके मजिउ धाल धकाः नेवाःतय्त विकास विरोधीया द्वपं नं वयेफु। तर नेवाःत विकास विरोधी मखु। अव्यवस्थित विकासया विरोधी जक खः। बाह्य रिंगरोडं स्वनिगलय् अझ मेगु न्यागू खुगू लाख पिनेयापिं मनू थपे यानाः थ्व लागायात च्वने हे लायक मजूगु नगर दयेका बी। अय् जूगुलिं थुकिया विरोध याये माःगु खः। कम से कम नं स्वनिगः विकासया सम्पूर्ण जिम्मा नेवाःतय् ल्हातय् मवःतले थ्व रिंगरोड दयेकेगु खँ जुइ मखु ।

More Stories Like this