देउवां दावी त्वःतीगु सम्भावना

देउवाया समर्थन गुरुङयात?

येँ (सन्ध्या टाइम्स)/प्रधानमन्त्री माधव नेपालं थःगु पदं राजीनामा बियादीधुंकाः थीथी पार्टी दुने सरकार गठनया कुतः न्ह्यानाच्वंसां थ्वहे पार्टीया थ्वहे मनुखं प्रधानमन्त्रीया नेतृत्व याइ धइगु खँ आः तकं अन्यौल हे जुयाच्वंगु दु। सरकार गठनया लागिं राष्ट्रपति डा. रामवरण यादवं बियादीगु म्याद बुधवाः क्वचायेत्यंगु दु। अथे खःसां यदि राष्ट्रिय सहमतिया सरकार गठन जुइगु जुल व उकिया लागिं ई मगात धाःसा राष्ट्रपतिं बिउगु छवाःया ईयात अझ भचा ताःहाकः यायेफुगु खँ धाःगु दु। तर अज्याःगु सरकार गठनया सम्भावना धाःसा आः तक पिहां मवःनिगु खँ नं सूत्रं धाःगु दु ।

थ्वहे झ्वलय् मेखे नेपाली कांग्रेस दुने रामचन्द्र पौडेलया सम्भावना अप्वया वःलिसे पुलांम्ह प्रधानमन्त्री शेरबहादुर देउवां थःगु दावी त्वःतीगु सम्भावना खने दया वःगु दु। सूत्रया कथं यदि पार्टीया कावा सभापति सुशील कोइरालां पौडेलयात समर्थन यात धाःसा देउवां मेम्ह दावेदार कुलबहादुर गुरुङ्गयात समर्थन याइगु जूगु दु। देउवा व गुरुङ्ग दथुइ आः नकतिनि अज्याःगु सहलह जूगु खँ विज्ञ सूत्रं धाःगु दु। यदि माल धाःसा कांग्रेसं हे सरकार गठनया दावी त्वःते फुगु खँ नं धाःगु दु ।

स्वंगू दलया मुँज्या स्थगित
संविधान निर्माण कार्यतालिका दयेकेगु व राज्य पुनर्संरचना आयोग दयेकेगु सवालय् थौं मूर्त रुप बीगु निंतिं च्वनेगु धाःगु स्वंगू दलया मुँज्या स्थगित जूगु दु। संविधानसभाया अध्यक्ष सुवास नेम्वाङया कुतलय् संविधान निर्माण यायेगु नापं राज्य पुरर्संरचना आयोग दयेकेगु सवालय् म्हिगः जूगु मुँज्याय् थौं सुथय् हाकनं अन्तिम रुप बीगु सहमति जूगु खः। मुँज्याय् एकीकृत माओवादी, नेपाली कांग्रेस व एमालेया नेतातय्सं ब्वति कयादीगु खः। नेपाली कांग्रेसया नेता बलबहादुर राई मदुगुलिं थौंया मुँज्याय् नेपाली कांग्रेसया नेतात वये मफइगु जुयाः स्थगित याःगु खः। आः कन्हय् हानं बैठक च्वनाः संविधान निर्माण कार्यतालिका व
राज्य पुनर्संरचना आयोगयात अन्तिम रुप बी धाःगु दु ।

थौं अन्त्येष्टि:
थ्वहे झ्वलय् मदुम्ह नेपाली कांग्रेसया नेता बलबहादुर राईया अन्त्येष्टि थौं याइगु जूगु दु। थौं वय्कःया थःगु हे बौद्ध राई परम्परा कथं वय्कःया थःगु हे छेँ ओलखढुंगाय् अन्त्येष्टि याइगु खँ धाःगु दु। वंगु छुं न्हि न्ह्यवंनिसें उसाँय् मदयाच्वंम्ह राई अस्पतालय् वासः याकाच्वंम्ह खः। ९० दँ दुम्ह राई नेपाःया प्रजातान्त्रिक आन्दोलनय् आपालं योगदान बियादीगु दु ।