माओवादीं बेइमानी यात: प्रम
येँ(सन्ध्या टाइम्स)/प्रधानमन्त्री पदं राजीनामा बियादीम्ह भाजु माधव नेपालं माओवादीं राजनीतिक बेइमानी याःगु द्वपं बियादीगु दु।
थौं सुथय् किपूया चम्पादेवी लागाय् च्वंगु पुष्पलाल स्मृति प्रतिष्ठान झायादीम्ह वय्कलं सञ्चारकर्मीलिसे खँ ल्हासें थ्व द्वपं बियादीगु खः।
थम्हं राजीनामा बिल धाःसा घौछिया दुने हे राष्ट्रिय सहमतिया सरकार दयेकाः क्यना बी धाःपिं माओवादीतय्सं आः तक नं राष्ट्रिय सहमतिया सरकार गठन याये मफुगुलिं थःत तसकं दुःख ताःगु खँ नं भाजु नेपालं कनादिल।
सरकार गठनया छुं तयारी मदुसां थःत घौछिया दुने सरकार दयेकाः क्यना बी धकाः माओवादीं राजनीतिक बेइमानी याःगु द्वपं नं वय्कलं बियादिल।
वय्कलं माओवादी, नेपाली कांग्रेस व एमाले दथुइ वंगु जेष्ठ १४ गते चान्हय् जूगु स्वंगू बुँदाया सहमति कथं ३ नम्बर बुँदाय् थम्हं राजीनामा बीगु खँ च्वयातःगु दु धासें थम्हं उगु बुँदा पूवंका बियागुलिं आः १ नम्बर बुँदायात कार्यान्वयन यायेगु ई त्यल धकाः नं धयादिल।
माओवादीं उगु सहमतियात अपब्याख्या याःगु द्वपं बिसें प्रम नेपालं आः ल्यं दुगु छगू हे जक बुँदा पूवंकेगु जिम्मा माओवादीयागु खः धयादिल।
माओवादीं आः वयाः मेमेगु दलतय्त झंगः लायेत्यंगु द्वपं नं वय्कलं बियादिल।
संसदय् थःगु पक्षय् बहुमत दयेक दयेकं नं राष्ट्रिय सहमतिया सरकारया दयेकेत थम्हं राजीनामा बियागु खः धासें प्रम नेपालं आः राष्ट्रिय सहमतिया सरकार हे दयेकेमाः धकाः नं बः बियादिल।
माओवादीं आः तक नं विद्रोही मानसिकता त्वःतूगु मदुनि धासें वय्कलं गबलय् तक माओवादीं थःगु अडान यथावत कयाच्वनी अबलय् तक राष्ट्रिय सहमति ब्वलंके फइ मखु धकाः नं थःगु निष्कर्ष अन न्यंकादिल।
थौं कांग्रेस एमालेया बैठक
सहमतिया सरकार दयेकेगु विषयय् थौं सनिलय् नेपाली कांग्रेस व एमाले नेतातय् दथुइ मंकाः बैठक च्वनीगु जूगु दु। कांग्रेसं सःतूगु उगु बैठकय् थःपिनि नेतृत्वय् राष्ट्रिय सहमतिया सरकार दयेकेगु निंतिं समर्थन यायेत एमालेयात प्रस्ताव तइगु खँ धाःगु दु। थौं सनिलय् एमालेलिसे बैठक च्वने न्ह्यः उकिया तयारी कथं सुथय् कांग्रेस केन्द्रीय पदाधिकारीतय् बैठक निं च्वंगु खः।
अथे हे थःगु नेतृत्वय् राष्ट्रिय सहमतिया सरकार दयेकेगु निंतिं माओवादी व एमालेया दथुइ नं ब्यागलं ब्यागलं बैठक जुयाच्वंगु दु। थौं सुथंनिसें निगू पार्टी दथुइ गृहकार्य जुयाच्वंगु खः। स्वंगुलिं पार्टीं थःथःपिनिगु हे नेतृत्वय् राष्ट्रिय सरकार दयेकेगु धाःसां अन्ततः राष्ट्रिय सरकार दयेके फइगु वातावरण धाःसा म्हो जुया वनाच्वंगु दु। राष्ट्रपति डा. रामवरण यादवं थ्वहे वइगु बुधवाः तकया दुने राष्ट्रिय सरकार दयेकेत म्याद बियादीगु खःसां आः तक दलतय् दथुइ उकिया सहमति धाःसा जुइ मफुनि।
