'आः नेतृत्वया पाः कांग्रेसयागु'

येँ(सन्ध्या टाइम्स)/ नेपाली कांग्रसया कार्यवाहक सभापति सुशिल कोइरालां आः सरकारया नेतृत्व यायेगु पाः कांग्रेसयागु खः धकाः दावी यानादीगु दु।
अमेरिकाय् वासः याकः वनाच्वंम्ह वय्कलं थौं नेपाः लिहां वयाखतं त्रिभुवन अन्तर्राष्ट्रिय विमानस्थलय् पत्रकारतलिसे खँ ल्हासें थ्व खँ धयादीगु खः। नेपालय् प्रधानमन्त्री माधव नेपालं आकाझाकां राजीनामा बियादीवं थःगु अमेरिका भ्रमण हे चीहाकः यानाः वय्कः नेपाः लिहां झाःगु खः।
माओवादी व एमालें सरकारया नेतृत्व यायेधुंकूगु नापं उमिसं शान्ति व संविधानया नितिं माःकथं ज्या याये मफुगुलिं आः सरकारया नेतृत्व यायेगु पाः कांग्रेसयागु खः धकाः नं वय्कलं दावी यानादिल। माओवादीं कब्जा यानातःगु सम्पत्ति लित मबीकं, वाइसीएलया अर्ध सैनिक संरचना भंग मयायेकं, नागरिक पार्टी मजुइकं वयात सरकारया नेतृत्व याके मबीगु खँ नं वय्कलं धयादिल। वय्कलं कांग्रेसया सरकार दयेकेत थनिंनिसें हे पलाः न्ह्याकेगु खँ नं कनादिल।
पार्टी दुने प्रधानमन्त्री जुइम्ह मनूया बारे छुं नं विवाद मदु धासें वय्कलं संसदीय दलया नेता हे प्रधानमन्त्री जुइ धयादिल। वय्कःयात लसकुस यायेत अन्तर्राष्ट्रिय विमानस्थलय् कांग्रेसया सलंसः कार्यकर्ता व नेतात वंगु खःसा देउवा पक्षया सुं नं नेता कार्यकर्ता धाःसा मवं। कोइरालां रामचन्द्रया पँ लिउगुलिं देउवा पुचः वय्कः खनाः तम्वयाच्वंगु दु।

थौं झिगू दललिसे माओवादी
थःपिनिगु नेतृत्वय् राष्ट्रिय सरकार दयेकेत माओवादी अध्यक्ष प्रचण्डया नेतृत्वय् नीस्वंगु वार्ता पुचलं थौं संविधानसभाय् दुथ्याःगु झिगू दललिसे सहलह ब्याकेत्यंगु दु। माओवादी संसदीय दलया ज्याकुथी थौं २ बजे लिपा थ्व सहलह जुइ। सरकार दयेकेगु विषयय् जुइगु उगु सहलहय् संविधानसभाय् दुथ्याःगु मधेशी जनअधिकार फोरम, नेपाः राष्ट्रिय पार्टी, नेपाल सदाभावना पार्टी (सरिता गिरी), चुरेभावर राष्ट्रिय एकता पार्टी, लोकतान्त्रिक समाजवादी दल, संघीय लोकतान्त्रिक राष्ट्रिय मञ्च, नेपाली जनता दल, नेकपा (एकीकृत), दलित जनजाति पार्टी व राष्ट्रिय जनमुक्ति पार्टीयात सःतातःगु दु।

लिपांगु इलय् वयाः देय्यात निकास बीगु निंतिं प्रधानमन्त्री माधवकुमार नेपालं राजीनामा बीमाः धइगु माग याना वयाच्वंगु माओवादी नापं झिंछगू दलया नेतालिसे थौं सहलह जुइधुंकाः थौं हे बहनीनिसें नेपाली कांग्रेस, एमाले नापं सरकारय् दुगु दलत फोरम लोकतान्त्रिक, तराई मधेश लोकतान्त्रिक पार्टी नापं थीथी पार्टीया नेतातलिसे नं माओवादीया वार्ता पुचलं सहलह ब्याकी धाःगु दु। माओवादीया वार्ता पुचलय् दुजः कथं पार्टीया न्वकुपिं मोहन बैद्य किरण व डा. बाबुराम भट्टराई नं च्वनादीगु दु। डा. भट्टराई गुगुं नं हालतय् आः माओवादीं सरकार गठन यायेमाः धइगु पक्षय् दु।